Ժամեր առաջ Սյունիքում տեղի ունեցած միջադեպը պետք է բնութագրել որպես դասական դրսևորում բաժանարար գծերի, ասել է թե՝ սևերի և սպիտակների. այսօր Ազգային ժողովում իր ելույթի ժամանակ ասաց ԱԺ փոխնախագահ Վահե Էնֆիաջյանը:
Նշենք, որ այսօր Սյունիքից վերադառնալիս «Բարգավաճ Հայաստան» խմբակցության պատգամավորների ճանապարհը քաղաքացիները փակել են՝ ասելով, որ «Հայրենիքի փրկության» շարժման վարչապետի թեկնածու Վազգեն Մանուկյանը պետք է գա մարզ, դրա համար են ճանապարհը փակել:
Էնֆիաջյանի խոսքով՝ «Բարգավաճ Հայաստան» խմբակցության ներկայացուցիչներ Միքայել Մելքումյանը, Իվետա Տոնոյանը, Շաքե Իսայանը, Արտյոմ Ծառուկյանը գտնվել են Սյունիքի մարզում պարբերաբար հանդիպումներ են ունեցել քաղաքացիների հետ:
Նրա փոխանցմամբ՝ ԲՀԿ պատգամավորները ոչ միայն ստեղծած իրավիճակով պայմանավորված հարցեր են կարգավորել և իրենց լիազորությունների շրջանակում գործողություններ իրականացրել, այլ նաև օգնություն են տրամադրել այն ընտանիքներին, որոնք ծայրահեղ ծանր վիճակում են, սննդի և կենցաղի հետ կապված խնդիրներ ունեն:
«Իշխանությունը, պարբերաբար խեղաթյուրելով ներկայիս իրականությունը, ձևավորելով կեղծ քաղաքական օրակարգ, փորձում է շեղել իրական հիմնախնդիրներից: Այսօր մեր առաջնային խնդիրներն է զոհված ընտանիքների և գերիների, անհետ կորածների և վիրավորների փախստականների խնդիրները լուծելը, դրանք հազարավոր ընտանիքներ են հազարավոր մեր քույր ու եղբայրներն են: Սա առաջնահերթությունների ձևավորման անկարողության, հաջողակ գործողությունների բացակայության դասական օրինակ է: Կեղծ օրակարգ ձևավորելով՝ ոչ մի դրական փոփոխություն չեք կարողանալու ձևավորել»,- եզրափակեց խոսքը նա: