Արարատի մարզի Այգեստան համայնքում մի խումբ ազատամարտիկներ այս պահին բողոքի ցույց են իրականացնում՝ ընդդեմ գյուղապետի:
Armday.am-ի հետ զրույցում Այգեստանի համայնքապետը վստահաբար նշեց, որ ցույցերն իր դեմ կազմակերպում է Արարատի մարզպետ Գարիկ Սարգսյանը:
«Էդ կոկորդիլոսի ձու աճեցնողն ամեն ինչ անում է իմ դեմ, սակայն ինչի՞ պիտի հասնի: Ուրցաձորի Ռաֆիկի դեմ էլ արեց, ինչի՞ հասավ: Ինչքան ուզում են, թող վարկաբեկեն: Իմ դեմ քրեական երկու գործ հարուցեցին, վեց ամիս քննեցին, կարճեցին հանցակազմի բացակայության պատճառով»,-ասաց նա:
Համայնքապետը նշեց, որ գյուղում գողության դեպքեր են լինում, գույք են փչացնում, ինքն էլ ստիպված է եղել Ոստիկանություն դիմել՝ անկախ այն բանից, որ գողությունը կատարել են ազատամարտիկները:
«Եթե պետական ունեցվածքը ոչնչացնում են, ով ուզում է լինի, պիտի դիմեի ոստիկանություն: Գյուղի լույսերը փչացնելու, գերեզմանի փականները հանելու համար դիմել եմ Ոստիկանություն, քրեական գործ են հարուցել: Եթե չեն արել, ինչու՞ են վախենում:Հ իմա ինձ վրա կեղտ գտնելու տարբերակ չունեն, տարածում են, թե ես հալածում եմ ազատամարտիկներին,բայց ես ինչո՞ւ պետք է ազատամարտիկից վրեժ լուծեմ, եթե ես նրանց միշտ օգնել եմ, և բոլորը գիտեն այդ մասին»,-ասաց Սոկրատ Հովսեփյանը:
Նշենք, որ Սոկրատ Հովսեփյանը համայնքը ղեկավարում է արդեն տաս տարի և վստահ է, որ ժողովուրդն իրեն ևս տաս տարի ձայն կտա:
Այգեստանի համայնքապետը եղել է ՀՀԿ-ական, սական վերջերս դուրս է եկել կուսակցության կազմից:
«Շարմազանովին ու Աշոտյանին խնդրեցի՝ փրկել կուսակցությունը, բայց այդ մարդիկ կպել են Սերժ Սարգսյանից, դրա համար ես դուրս եկա կուսակցությունից»,-ասաց նա:
Ավելի վաղ, Ուրցաձորի համայնքապետ Ռաֆիկ Անդրեասյանը վերընտրվելուց հետո ասել է, որ իրեն զրպարտողները պատասխան են տալու: Արարատի մարզպետը պահանջել էր համայնքապետի հրաժարականը:
