Աջ ղեկով մեքենա ներկրողները բողոքի ակցիա են իրականացնում կառավարության շենքի դիմաց։ Նրանց խոսքով՝ իշխանությունը չի պահել իր խոստումը.մի բան պայմանավորվել է, այլ բան արել։
«Վերջին անգամ վարչապետին հանդիպել ենք նոյեմբերի 28-ին՝ Բագրատաշենում, պայմանավորվածություն էր ձեռք բերվել լուծել 800-1100 մեքենայի հարցը․ Մեզ փոխանցեցին, որ վարչապետը որոշում է կայացրել հօգուտ մեզ և կթույլատրվի աջակողմյան ղեկով 800-1100 մեքենան բերել Հայաստան, որից հետո պետք է նախագիծը գնար կառավարություն, հետո ԱԺ։ Սակայն փետրվարի 15-ին նախագիծը քննարկվեց կառավարությունում և մերժվեց»,-ասաց «Ղեկը աջ» նախաձեռնության անդամներից մեկը:
Բողոքի ակցիայի մասնակիցները անդրադարձել են նաև այն հարցին, թե ի՞նչ երաշխիքներ կան, որ դրանից ավելի մեքենա չի մտնի Հայաստան:
«Մենք տրամադրել ենք 825 մեքենայի VIN կոդերը։ Մեզ հարցնում են՝ ինչո՞ւ այդ մեքենաները կանգնած չեն սահմանին, բայց պատկերացնո՞ւմ եք՝ ինչ կլինի, եթե բոլոր մեքենաները այնտեղ բերենք. Բագրատաշենի մաքսակետը կաթվածահար կլինի»,-նշեց նախաձեռնության անդամը:
Հիշեցնենք, որ նախագիծը կառավարության դատին ներկայացրել էր ՀՀ տրանսպորտի, կապի և տեղեկատվական տեխնոլոգիաների նախարար Հակոբ Արշակյանը։ Վարչապետ Նիկոլ Փաշինյանը մերժել էր նախագիծը՝ ասելով, որ խոսքը պետք է վերաբերի միայն այն 442 մեքենաներին, որոնք մնացել են Հայաստանի սահմանին՝ մաքսային գոտում։ Սրանով վարչապետը հստակեցում մտցրեց նախագծի բովանդակության մեջ՝ նշելով, որ պետք է նախագծով թույլ տրվի միայն կոնկրետ այդ 442 մեքենաների ներկրումը, ոչ թե այն մեքենաների, որոնք այս պահին գնվել են բայց դեռ գտնվում են Ճապոնիայում։
