Ապրիլի 5-ին, ժամը 13.15-ին, ոստիկանության Իջեւանի բաժնի քրեական հետախույզները իրացնելով ստացված օպերատիվ տեղեկությունները, «Հայանտառ» ՊՈԱԿ «Իջեւանի անտառտնտեսության» մասնաճյուղի Իջեւանի անտառպետության «Ծառուտի ձոր» կոչվող տարածքում հայտնաբերել են 44-ամյա Տիգրան Պ․-ին պատկանող «ԶԻԼ» բեռնատարը՝ բարձված 13 հացենու եւ 2 լորենու տարբեր տրամաչափի գերաններով։
Ոստիկանությունից հայտնում են, որ բացի այդ, մեքենայի մոտ հայտնաբերվել է 20 հացենու եւ 3 լորենու 220 սմ երկարությամբ տարբեր տրամաչափի գերաններ։ Տիգրան Պ․-ն համապատասխան փաստաթուղթ չի ներկայացրել եւ հայտնել է, որ ապօրինի հատել է 2 լորենի եւ 4 հացենի կանգուն ծառեր:
15 գերաններով բարձված բեռնատարը տեղափոխվել է բաժնի հատուկ պահպանվող տարածք, իսկ 23-ը ի պահ է հանձնվել Իջեւանի անտառտնտեսության աշխատակիցներին:
Վնասի չափը պարզվում է:
Նախապատրաստվում են նյութեր:
