Այսօր՝ փետրվարի 2-ին, արտակարգ դեպք է տեղի ունեցել Տավուշի մարզում։ Ժամը 11։20-ի սահմաններում արտակարգ իրավիճակների նախարարության փրկարար ծառայության 9-11 օպերատիվ կառավարման կենտրոն ահազանգ է ստացվել, որ հրդեհ է բռնկվել Չինչին գյուղի անասնաֆերմաներից մեկում։
Այս մասին մանրամասներ իմանալու նպատակով ArmDay.am-ը կապ հաստատեց Չինչինի համայնքապետ Կարեն Դարբինյանի հետ:
«Վնասի չափը դեռ չեմ կարող ասել, մոտ 30 խոշոր եղջերավոր անասուն է վառվել, մոտավորապես 1000 քառակուսի մետր տարածք էր զբաղեցնում անասնաֆերման: Հրդեհի պատճառները դեռ հայտնի չեն»,-ասաց համայնքապետը:
Նրա խոսքով՝ անասնաֆերման գյուղից դուրս է գնտվում և այլ կառույցներ չեն վնասվել հրդեհի պատճառով:
Հրդեհված անասնաֆերման պատկանում է նույն գյուղի բնակիչ Ավետիք Ադամյանին:
Հարցին, թե պետությունը նման դեպքում փախհատուցում կնախատեսի, համայնքապետը նշեց, որ քանի դեռ հետաքննությունը չի պարզել դեպքի հանգամանքները, չի կարող այդ մասին խոսել:
