«Երբ թվային համակարգը և թվային վերափոխման օրակարգն սկսեց գործել, մի քանի խնդիր ի հայտ եկան, և անցած տարվա վերջում ընդունվեց «Հանրային տեղեկությունների մասին» օրենքը, որի 20-րդ հոդվածը հստակ ձևակերպում էր, թե ինչ ենթահամակարգեր էր պետք ստեղծել համակարգը աշխատեցնելու համար: Խոսքը 5 ենթահամակարգերի՝ տվյալների դասակարգման, ազգային տարածական ենթակառուցվածքի, տեղեկատվական համակարգերի անվտանգային միջոցների համակարգերի, տվյալների փոխանակման և պետական տեղեկատվական համակագի կառավարման համակարգի մասին եր»,-գործադիրի նիստում ասաց Բարձր տեխնոլոգիական արդյունաբերության նախարարի առաջին տեղակալ Գևորգ Մանթաշյանը;
Նա զեկուցեց «Տվյալների դասակարգման համակարգ ստեղծելու և դրա կիրառման կարգը հաստատելու մասին», ինչպես նաև «Պետական տեղեկատվական համակարգի կառավարչական համակարգ ստեղծելու և դրա կիրառման կարգը հաստատելու մասին» որոշման նախագծերը, որոնք վերաբերում են թվային տվյալների մասով ստանդարտ սահմանելուն:
Մանթաշյանի խոսքով՝ այս համակարգերի փոխգործելիությունը և մի ստանդարտով իրար հետ «շփվելը» շատ կարևոր են, որպեսզի ճշգրիտ և առանց խափանումների տեղեկություններ փոխանակվեն համակարգերի միջև:
«Այս որոշումով մենք այդ ստանդարտն ենք ձևակերպում, թե ինչ ձևով պետք է լինի, ինչ ձևաչափով պետք է տեղեկությունները հավաքվեն»,- ասաց նա՝ հավելելով, որ եթե չկա տվյալների միասնական ստանդարտ, ապա, օրինակ, պետական ռեգիստրում իր մասին տեղեկությունը՝ բնակության վայր, կարող է գրանցված լինել տարբեր կերպ՝ մի տեղ՝ «Երևան», մի տեղ՝ «Եր» և այլն, և երբ ստանդարտ ընդունվի, տարբեր ձևակերպումները բոլոր շտեմարաններում նույն կերպ կլինեն:
Կառավարության նիստը վարող փոխվարչապետ Մհեր Գրիգորյանն էլ հավելեց, որ ստեղծում են տվյալների ստանդարտ, որը պիտի օգտագործվի շտեմարաններում տվյալների մուտքագրման և պահպանման, հետագա օգտագործման համար:
«Այսինքն՝ ըստ էության, սա իմպերատիվ է պետական մարմինների համար, թե ոնց ենք մենք աշխատելու տվյալի հետ, որպեսզի ապահովենք 1X1 տվյալ և այդ տվյալի գոյությունը բոլոր համակարգերում, որպեսզի ամեն անգամ մարդկանց չասենք՝ անձնագրի պատճենը բեր, ID քարտի պատճենը բեր և այլն»,-ասաց Գրիգորյանը:
