Արարատի մարզի Ավշար գյուղի միջնակարգ դպրոցի տնօրեն Հերմինե Անդրեասյանը պաշտոնից ազատման դիմում է ներկայացրել: Այս մասին ArmDay.am-ին հայտնեց Ալինա Մախսուդյանը, ով տնօրենի դեմ բողոքի ակցիա կազմակերպողներից է:
«Մենք միչև վերջին պահը պայքարեցինք, ու վերջապես հասանք հաղթանակի: Դասադուլը շարունակվել է այս ընթացքում և մենք արդեն մտադիր էին միջպետական ճանապարհը փակել ու չբացել, մինչև նա կհեռանար իր պաշտոնից: Թող հեղափոխությունից հետո բոլորը իմանան, որ ոչ-ոք ոչ մեկի մեջքը չի ամրացնելու, և պետք է ինքնուրույն հաստատվեն:Եթե մեկը հայտարարի, որ իր մեջքը ամուր է, ես պատրաստ եմ ապացուցել, որ նրա մեջքը չի կարող ամուր լինել: Մեջքերի դարաշրջանը հեղափոխությունից հետո անցել է, հիա նոր էջ է բացվել»,-ասաց նա:
Ակտիվիստը նշեց, որ այժմ հավաստագիր ունեցող թեկնածու չկա դպրոցի ներսում, և հավանաբար, ժամանակավոր պաշտոնակատար կնշանակվի, ում աշխատակազմը սիրով կընդունի:
«Կարծում եմ ՝ նոր տնօրենը կհասկանա, թե ինչ ուժեղ աշխատակազմի հետ գործ ունի, որն ունի ինքնասիրություն ու ազնվություն: Մենք այժմ բավարարաված ենք, մեր բողոքի ձայնը տեղ հասավ, սակայն պատկերացնում ենք, որ հեշտ չի լինելու, այժմ ստուգումներ կլինեն: Մենք ապացուցեցինք, որ իշխանությունը կարող է նաև պարտվել, եթե արդարության կողմնակիցը չէ»,-ասաց Ալինա Մախսուդյանը:
Արարատի մարզպետարանն իր հերթին հայտարարություն է տարածել, որ Հերմինե Անդրեասյանը պաշտոնից ազատման դիմում է ներկայացրել:
Հերմինե Անդրեասյանի՝ պաշտոնից ազատման որոշման պարզաբանման մեջ, մասնավորապես, ասվում է.
«Հարգելի պարոն Սարգսյան, խնդրում եմ այս դիմումի համաձայն ազատել ինձ Ավշարի միջնակարգ դպրոցի տնօրենի պաշտոնից և ստորև ներկայացնում եմ այդ որոշման պարզաբանումը։ Ես՝ Հերմինե Անդրեասյանս, մարտի 1-ին ընտրվել եմ Ավշարի միջնակարգ դպրոցի տնօրեն` 7 կողմ և 1 ձեռնպահ ձայնով: Օրենքին համապատասխան անցկացված մրցույթում հաղթել եմ ձայների մեծամասնությամբ: Երկու շաբաթվա ընթացքում, չնայած վերապրածիս, ամենից շատ ինձ մտահոգեց և շարունակում է մտահոգել դպրոցահասակ երեխաների կրթություն ստանալու իրավունքի ոտնահարման հանգամանքը։ Մենք` մանկավարժներս, պարտավոր ենք ապահովել հավասար պայմաններ այդ իրավունքի իրականացման համար:
Դա է մեր կոչումը և սրբազան պարտականությունը: Ես, որպես մանկավարժ, ՀՀ քաղաքացի և ծնող` նաև այն երեխայի, ում կրում եմ կրծքիս տակ և ով լույս աշխարհ կգա, ցանկանում եմ, որպեսզի մեր երեխաները, մասնավորապես Ավշարի միջնակարգ դպրոցի երեխաները, կրթություն ստանան, և ամենակարևորը` այն ստանան առողջ կրթական միջավայրում, որտեղ մեծերի մասնավոր շահերը կստորադասվեն և խոչընդոտ չեն հանդիսանա երեխաների որակյալ կրթության ապահովմանը: Ներողություն եմ խնդրում բոլոր այն մարդկանցից, ովքեր այս քայլս որպես թուլություն կորակեն, քանի որ ընտրված լինելով որպես օրինական տնօրեն և չոտնահարելով Ավշարի միջնակարգ դպրոցում դասավանդող որևէ ուսուցչի և սովորող որևէ աշակերտի իրավունք, հրաժարական եմ տալիս, սակայն հույս ունեմ, որ որպես ներկա կամ ապագա ծնողներ ձեզանից յուրաքանչյուրը կհասկանա իմ որոշումը․ինձ համար իմ ապագա երեխայի առողջությունը շատ կարևոր է, իսկ ձևավորված ատելության մթնոլորտի պայմաններում իմ հետագա պաշտոնավարումը կարող է վտանգավոր լինել նրա առողջության համար։ Ցանկանում եմ շնորհակալություն հայտնել այն մարդկանց, որոնք այս ընթացքում եղել են իմ կողքին»։
Հիշեցնենք, որ մարտի 12-ից Ավշարի միջնակարգ դպրոցում աշակերտները դասադուլ էին սկսել, ծնողների հետ միասին պահանջում էին դպրոցի նորանշանակ տնօրեն Հերմինե Անդրեասյանի հրաժարականը։
