Մանվել Գրիգորյանի՝ կալանքից գրավի դիմաց ազատ արձակման դեմ պայքարող երիտասարդներից Ջիվան Աբրահամյանի խոսքով՝ իրենց շարժումը կապված չէ որևէ մի անձի հետ: «Եթե ինչ-որ մեկը մտածում է, որ ես կարող եմ ունենալ որևէ ուղղվածություն, քան մեր կառավարությունն է, չարաչար սխալվում է»,-իր Facebook-ի ուղիղ եթերի ժամանակ ասաց նա:
Վերջինս նշեց, որ իրենք սկսում են հանուն օրենքի ու իրավական երկիր ստեղծելու համար պայքար, որը կոչվելու է «Իրավապահանջ քաղաքացի, հզոր պետություն» նախաձեռնություն:
Նա հիշեցրեց, որ առաջին պայքարն էլ հենց Մանվել Գրիգորյանի ազատ լինելու դեմ է, նա պետք է հայտնվի ճաղերի հետևում:
Հիշեցնենք, որ Մանվել Գրիգորյանի ազատ արձակման դեմ բողոքի ակցիան ավարտվել է այսօր Սուրբ Հռիփսիմե եկեղեցու մոտ: Քաղաքացիները պայմանավորվել են ակցիան շարունակել վաղը արդեն Երևանում:
Հիշեցնենք, որ դեկտեմբերի 21-ից Արմավիրի մարզում տեղի են ունենում գեներալ–լեյտենանտ Մանվել Գրիգորյանին գրավի դիմաց ազատ արձակելու որոշման դեմ բողոքի ակցիաներ։ Ակցիայի մասնակիցները փակել էին ինչպես Էջմիածին քաղաքի փողոցները, այնպես էլ Երևան-Արմավիր մայրուղին: Նրանք պահանջում են, որպեսզի Մանվել Գրիգորյանը կրկին կալանավորվի: Ավելի վաղ, Մանվել Գրիգորյանն ազատ էր արձակվել 25 մլն դրամ գրավի դիմաց:
