Երեկ Արմավիրի մարզի Ջրառատ համայնքում տեղի ունեցած միջադեպի փաստով նախապատրաստված նյութերը ՀՀ Ոստիկանությունն ուղարկել է ՀՀ քննչական կոմիտե: Սույն տեղեկատվությունը Armday.am-ին հայտնեցին ՀՀ Ոստիկանությունից: Քննչական կոմիտեից էլ տեղեկացնում են, որ միջադեպից հետո 5 անձ բերման է ենթարկվել ոստիկանություն, իսկ ևս մեկը կամավոր է ներկայացել, 6-ն էլ ազատ են արձակվել:
Հիշեցնենք, որ երեկ «Օհանյան-Րաֆֆի-Օսկանյան» դաշինքը հաղորդագրություն էր տարածել՝ նշելով, որ Ջրառատի գյուղապետ Սամվել Գալստյանի կողմից սպառնալիքներ է հնչեցվել գյուղի բնակչի՝ «Օհանյան-Րաֆֆի-Օսկանյան» դաշինքի համակրի հանդեպ՝ նշելով, որ սույն գյուղապետը ոչ անհայտ փոխոստիկանապետ Լևոն Երանոսյանի բարեկամն է, իսկ գյուղն էլ նույն Երանոսյանի ծննդավայրն է:
Հաղորդագրության մեջ նշվում էր նաեւ, որ գյուղապետի շրջապատը ներկայացնող անձանցից մեկը դաշինքի կողմնակցի վրա ատրճանակ է ուղղել։ Ատրճանակը «Օհանյան-Րաֆֆի-Օսկանյան» դաշինքի կողմնակիցները խլել են նրա ձեռքից եւ վնասազերծել օրինախախտին:
Հիշեցնենք, Դաշինքի հաղորդագրության մեջ նշվում էր, որ ատրճանակով սպառնացող սուբյեկտին կարգի հրավիրելու փոխարեն իրավապահ մարմինների ներկայացուցիչները ոստիկանության Էջմիածնի բաժին են բերման ենթարկել «Օհանյան-Րաֆֆի-Օսկանյան» դաշինքի համակիրներին:
Հավելենք, որ armtimes.com-ի տեղեկություններով Լեռնիկ Երանոսյանը ձախ այտի սալջարդ ախտորոշմամբ տեղափոխվել է Վաղարշապատի հիվանդանոց:
