Այսօր համացանցում է հայտնվել Բժշկական համալսարանում դիպլոմների արարողության ժամանակ տեղի ունեցած սկանդալային միջադեպի տեսագրությունը, որտեղ, ինչպես նշված է, Նարեկ Վանեսյանը հրում է դասախոսին:
Հետևողական լինելով թեմայի զարգացումներին՝ ArmDay.am-ը Հոգեկան առողջության ազգային կենտրոնի տնօրեն Ն. Վանեսյանից պարզաբանում է ստացել տեսանյութի հետ կապված:
««Հերոսն ու հերոսուհին» չեն ճանաչում իրենց ԲՈւՀ-ի դասախոսներին: Քանի որ արդեն մեր հիշարժան երեկոն փչացրել էին, խնդրել եմ գոնե համակուրսեցիներով մեկ լոսանկար ունենալ, սակայն դրան ևս, փորձեցին խանգարել: Այդ ժամանակ ձեռքից բռնել ու այլ կողմ եմ ուղղորդել այդ մարդուն»,-ասաց Վանեսյանը:
Նրա խոսքով՝ տեսանյութում երևացող մարդը, ում ինքը հրում է, դասախոս չէ:
«Նա դասախոս չէ, այլ ծրագրի ղեկավարի օգնական է: Նրանք, որպես ռեկտոր, աշխատակազմի ղեկավար կամ այլ պաշտոնյա այնքան անուշադիր են եղել մեր ծրագրին, որ դասախոսներին էլ չեն ճանաչում. ամոթ է»,-ասաց նա:
Ն. Վանեսյանը հավելեց, որ իրեն տեղեկացրել են, որ էթիկայի հանձնաժողովում հարց են ուզեցել բարձրացնել նրան դիպլոմից զրկելու համար:
«Նշեմ, որ դա նրանց վախճանը կլինի, որովհետև «հերոսն ու հերոսուհին» մոռացել են, որ ի տարբերություն իրենց ԲՈՒՀ-ի, սա նոր Հայաստանն է և կհանդիպենք դատաիրավական հարթությունում, որտեղ կտուժեն այնպես, ինպես այս օրերին սկսել են հերքել իրենց հայտարարության որոշ տեքստեր։ Ընդհանուր առմամբ, ափոսում եմ, որ այսպես ստացվեց: Եթե ԲՈւՀ-ի ներսում խնդիր կար, դա պետք է լուծվեր ԲՈւՀ-ի ներսում, ոչ թե հանրայնացվեր։ Դա ևս մեկ անգամ վկայում է նրանց ոչ կոմպետենտության մասին։ Հուսամ՝ կվերանայեն իրենց գործելաոճը և կավարտվի իրենց կազմակերպած այս խրախճանքը»,-շեշտեց Վանեսյանը:
