Մեր պետությունը, տնտեսությունը ու ամեն բան զարգանում է միայն գիտության հիմքի վրա։ Մենք բոլորս գիտենք, որ ամենալավ կրթական ծրագիրը եղել է սովետական կրթական ծրագիրը, որն այսօր օգտագործում է ԱՄՆ-ն, իսկ մենք Բոլոնիայի ծրագիրն ենք օգտագործում։ Այս մասին սեպտեմբերի 1-ին լրագրողների հետ զրույցում ասաց Գագիկ Ծառուկյանը։
Քաղաքական հարցերին անդրադառնալով՝ ԲՀԿ ղեկավարն ասաց․
«Մենք ժողովրդի ցավը տանենք․ Ժողովուրդը թեկնածուն առաջադրեց, մենք միացանք նրանց ցանկությանը։ Մեր առաքելությունն է ժողովրդի հույսն ու հավատը իրականացնել։
Չի եղել պատմության մեջ դեպք, երբ Ծառուկյանը որևէ բան խոստանա ու չիրականացնի: Մենք ներկայացնելու ենք մեր թեկնածուին, մեր ծրագրերը, այն, ինչ անհրաժեշտ է Երևանի համար: Կներկայացնենք մեր ծրագրերը, Երևանի խնդիրներն ու դրանց լուծումները: Երևանցին կծանոթանա մեր թեկնածուների հետ, նրանց արածների հետ՝ ոչ միայն խոսքով, այլև իրական կյանքում»,- ասաց Ծառուկյանը:
Այն հարցին թե «Բարգավաճ Հայաստան» կուսակցությունը կսատարի՞ Ռոբերտ Քոչարյանին, Ծառուկյանը պատասխանեց․ «Բարգավաճ Հայաստան» կուսակցությունը քաղաքականություն վերադարձող ՀՀ երկրորդ նախագահ Ռոբերտ Քոչարյանին սատարելու հարց չի քննարկել: Սակայն կարող եմ ասել, որ ցանկացած մարդ կարող է զբաղվել քաղաքականությամբ»։
Վերջում Գագիկ Ծառուկյանը նշեց,որ ով էլ հաղթի, պատրաստ են ընդունելու և որևէ ավելորդ բառ չի հնչի իրենց կողմից։
