Սյունիքում հայ-ադրբեջանական սահմանը հատած, Շաքի գյուղի բնակչի տանը գիշերած, բնակիչներին վնասվածքներ հասցրած ադրբեջանցի զինծառայող Նասիմի Ռահիմ Օղլի Մուսաևի նկատմամբ հարուցված քրեական վարույթի նախաքննությունն ավարտվել է։ Այն մեղադրական եզրակացությամբ ուղարկվել է դատախազություն։ Այս մասին Panorama.am-ին հայտնեց ՔԿ մամուլի խոսնակ Կիմա Ավդալյանը։
Հիշեցնենք, որ այս տարվա հոկտեմբերի 1-ին Ադրբեջանի քաղաքացի, զինծառայող Նասիմի Մուսաևն ապօրինի կերպով հատել է Հայաստանի պետական սահմանը և մտել Շաքի գյուղի տներից մեկը: Հայտնաբերվելուց հետո նա կրակոցներ է արձակել, ինչի հետեւանքով հրազենային վնասվածք է ստացել տանտիրուհին՝ 39-ամյա Անի Ավետիսյանը, տուժել են նաև երեխաները։ՀՀ Գլխավոր դատախազությունը հոկտեմբերի 2-ին հանրային քրեական հետապնդում էր հարուցել Մուսաևի նկատմամբ մի քանի հոդվածներով՝
ՀՀ քրեական օրենսգրքի 166-րդ հոդվածի 2-րդ մասի 4-րդ և 6-րդ կետերով (առողջությանը ծանր վնաս պատճառելը),
207-րդ հոդվածի 1-ին մասով (բնակարանի անձեռնմխելիությունը խախտելը),
335-րդ հոդվածի 1-ին մասով (հրազենի ապօրինի շրջանառություն),
340-րդ հոդվածի և 469-րդ հոդվածի 1-ին մասերով, ինչպես նաև պետական սահմանն ապօրինի հատելու համար։
Նույն օրը ադրբեջանցին կալանավորվել էր 2 ամիս ժամկետով։ Մինչ այս պահը ադրբեջանցու կրակոցից տուժած կինը գտնվում է հիվանդանոցում։ Օրեր առաջ նա երկորրդ անգամ է վիրահատության ենթարկվել։
