«Հայաստան» խմբակցությունը դեմ է քվեարկելու ԹՐԻՓՓ համաձայնագրի վավերացման նախագծին

Ընդդիմադիր «Հայաստան» խմբակցությունը դեմ կքվեարկի TRIPP նախագծով Հայաստանի և ԱՄՆ-ի միջև ռազմավարական համագործակցության մասին շրջանակային համաձայնագրի վավերացման նախագծին։ Այս մասին հոկտեմբերի 27-ին Ազգային ժողովի նիստում՝ «Թրամփի ուղի՝ հանուն միջազգային խաղաղության և բարգավաճման» (TRIPP) նախագծով Հայաստանի և ԱՄՆ-ի միջև ռազմավարական համագործակցության շրջանակային համաձայնագրի վավերացման նախագծի քննարկման ժամանակ, հայտարարեց խմբակցության ղեկավար Աննա Գրիգորյանը, գրում է News.am-ը։Նա, մասնավորապես, ներկայացրեց համաձայնագրի վերաբերյալ խմբակցության մտահոգությունները՝ անդրադառնալով Հայաստանի համար ակնկալվող տնտեսական օգուտներին, տրանսպորտային հաղորդակցությունների բացմանը և փոխադարձության սկզբունքի կիրառմանը։

Պատգամավորի գնահատմամբ՝ թեև համաձայնագիրը երկկողմ է, դրա բովանդակության մեջ արտացոլված են նաև ադրբեջանական կողմի շահերը։

«Թղթի վրա սա երկկողմ համաձայնագիր է։ Այսինքն՝ դրա կողմերն են Հայաստանի Հանրապետությունն ու Ամերիկայի Միացյալ Նահանգները։ Սակայն իր էությամբ և բովանդակությամբ դրանում առկա է նաև երրորդ կողմ՝ հանձինս Ադրբեջանի։ Ավելին, Ադրբեջանի շահերն այս փաստաթղթում արտացոլված են շատ ավելի անմիջականորեն, քան Հայաստանի Հանրապետության շահերը», — ասաց Գրիգորյանը։

Նա նաև նշեց, որ այս նախագծի շնորհիվ ԱՄՆ-ը ներկայություն կապահովի տարածաշրջանում՝ Իրանի հետ սահմանի մոտ, իսկ Ադրբեջանը՝ կապ կպահպանի իր հիմնական տարածքի և Նախիջևանի միջև։ Ընդդիմադիր գործիչը հետաքրքրվեց, թե նման պայմաններում համադրելի ինչ հնարավորություններ և օգուտներ է ստանալու Հայաստանը։

Գրիգորյանը բարձրացրեց նաև սահմանային և մաքսային ընթացակարգերի կազմակերպմանն առնչվող հարցեր։ Նա, մասնավորապես, հետաքրքրվեց՝ արդյոք Հայաստանի և Ադրբեջանի տարածքներով անցնող մարդկանց ու բեռների համար հավասարազոր պայմաննե՞ր են գործելու։

Բացի այդ, խորհրդարանական խմբակցության ղեկավարն ընդգծեց վերոհիշյալ նախագծի իրականացումից Հայաստանի ակնկալվող եկամուտների վերաբերյալ հստակ հաշվարկներ ներկայացնելու անհրաժեշտությունը։