Հակակոռուպցիոն դատարանում այսօր կայացել է ՀԱՊԿ միացյալ շտաբի պետի նախկին տեղակալ Հայկազ Բաղմանյանի գործի քննությունը։
Դատարանը, դատավոր Վարդգես Սարգսյանի նախագահությամբ, քննել է հանրային մեղադրողի դիրքորոշումն այն մասին, որ Բաղմանյանի նկատմամբ ընտրված խափանման միջոցները՝ 40 մլն դրամ գրավը և բացակայելու արգելքը պետք է պահպանվեն:
Պաշտպանական կողմը պահանջել է հանել «բացակայելու արգելք» խափանման միջոցը՝ հաշվի առնելով այն հանգամանքը, որ Բաղմանյանը Հայաստանում չի եղել, երբ նրա նկատմամբ քրեական հետապնդում թ հարուցվել, սակայն վերադարձել է Հայաստան, հետևաբար, երկրից փախչելու մտադրություն ունենալ չի կարող։
«Ես փախնելու տեղ չունեմ, իմ հայրենիքը Հայաստանն է»,–դատարանի դահլիճում հայտարարել է գեներալ լեյտենանտ Հայկազ Բաղմանյանը։
Դատարանն անփոփոխ է թողել Բաղմանյանի նկատմամբ կիրառված համակցված խափանման միջոցը։
Ըստ մեղադրանքի՝ Բաղմանյանը, 1999 թվականի հոկտեմբերի 29-ից մինչև 2003 թվականի հոկտեմբերի 8-ը զբաղեցնելով ՀՀ ՊՆ N բանակային կորպուսի հրամանատարի, այնուհետև մինչև 2009 թվականի հունվարի 26-ը՝ ՀՀ ՊՆ N բանակային կորպուսի հրամանատարի, այնուհետև մինչև 2017 թվականի դեկտեմբերի 5-ը՝ ՀՀ զինված ուժերի գլխավոր շտաբի պետի տեղակալի, ապա՝ 2018 թվականի մարտի 22-ից մինչև 2020 թվականի դեկտեմբերի 31-ը՝ Հավաքական անվտանգության պայմանագրի կազմակերպության միացյալ շտաբի պետի տեղակալի պաշտոնները, խախտելով «Զինվորական ծառայության անցնելու մասին» 2002 թվականի հուլիսի 3-ին ընդունված և 2017 թվականի դեկտեմբերի 16-ին՝ ուժը կորցրած ՀՀ օրենքի 1-ին հոդվածի 3-րդ մասի 7-րդ կետի, ինչպես նաև «Զինվորական ծառայության և զինծառայողի կարգավիճակի մասին» 2017 թվականի դեկտեմբերի 16-ին ուժի մեջ մտած ՀՀ օրենքի 8-րդ հոդվածի 1-ին մասի 7-րդ կետի պահանջները, օրենքով նախատեսված արգելքին հակառակ, այն է՝ զինծառայողն իրավունք չունի անձամբ զբաղվել ձեռնարկատիրական գործունեությամբ, 2001 թվականի մարտի 21-ից վստահված անձանց, այդ թվում՝ իր հետ մտերիմ, ապա նաև՝ խնամիական հարաբերությունների մեջ գտնվող, ընկերության մեկ այլ բաժնետեր և տնօրեն Կարեն Գալոյանի օժանդակությամբ մասնակցել է «ԱՔՎԱՏԻԿ» ՍՊ ընկերության կառավարմանը՝ արտոնություններ, առավելություններ տրամադրելով նշված կազմակերպությանը և հովանավորելով իրականացվող գործունեությունը, որը դրսևորվել է Հայկազ Բաղմանյանի պաշտոնեական դիրքից բխող ազդեցությունը, հեղինակությունը և կապերը՝ ի շահ ընկերության օգտագործելով` ՀՀ պաշտպանության նախարարության կարիքների համար սննդամթերք մատակարարելու մրցույթների արդյունքում առանց խոչընդոտների հաղթող ճանաչվելու և ՀՀ պաշտպանության նախարարության հետ կնքված 7.559.414.437 ՀՀ դրամի պայմանագրերի շրջանակներում մատակարարված ապրանքների ընդունումը և դրանց դիմաց վճարումը, ըստ էության, գործունեության համար անհրաժեշտ թույլտվությունների ստացումն ապահովելու միջոցով, ինչից հետո նպատակ ունենալով՝ քողարկելու՝ առևտրային կազմակերպությանն առավելություններ, արտոնություններ տրամադրելու, դրա գործունեությունը հովանավորելու զուգորդված ձեռնարկատիրական գործունեությանն ապօրինի մասնակցելու արդյունքում ստացված առանձնապես խոշոր չափերով դրամական միջոցների հանցավոր ծագումը, դրանց իրական բնույթը, տնօրինման եղանակը, իրական իրավունքներն ծագման աղբյուրը, պատկանելիությունը, գույքին օրինական տեսք տալու նպատակով, այն օրինականացրել է մի շարք բանկային փոխանցումների և փոխարկումների միջոցով, այդ թվում՝ այլ անձանց անվամբ գույք ձեռք բերելու և իր հայեցողությամբ տնօրինելու եղանակով։ Բացի այդ, Հայկազ Բաղմանյանը, հանդիսանալով հայտարարատու պաշտոնատար անձ, Բարձրաստիճան պաշտոնատար անձանց էթիկայի, ապա՝ Կոռուպցիայի կանխարգելման հանձնաժողով ներկայացրած իր` 2017 թվականի պաշտոնատար անձի պաշտոնը դադարեցնելու հայտարարագրում, 2018 թվականի պաշտոնատար անձի պաշտոնը ստանձնելու, ինչպես նաև նույն թվականի տարեկան հայտարարագրերում, 2019 թվականի տարեկան և 2020 թվականի պաշտոնեական պարտականությունները դադարեցնելու մասին հայտարարագրերում թաքցրել է գույքերի և եկամուտների վերաբերյալ տվյալները, ինչը հանգեցրել է առանձնապես խոշոր չափերով գույքերի և եկամուտների չհայտարարագրմանը»։
