Աթենքում ընթանում է հունահռոմեական ոճի ըմբշամարտի պատանիների աշխարհի առաջնությունը: 50 կգ քաշային կարգում Հայաստանի ներկայացուցիչ Հայկ Ասատրյանը բրոնզե մեդալ նվաճեց:
Հայ ըմբիշը երրորդ տեղի համար գոտեմարտում հաղթեց շվեդ Նիկլաս Օեհլենին: Այսօր մեկնարկած մեր ըմբիշները դուրս մնացին մեդալի համար պայքարից: 69 կգ Սարգիս Թադևոսյանը հաղթեց որակավորման փուլում և 1/8 եզրափակչում, սակայն քառորդ եզրափակչում պարտվեց վրացի Դավիթ Սոլոգաշվիլիին:
76 կգ Դավիթ Պողոսյանը և 85 կգ Տիգրան Համբարձումյանը դուրս մնացին որակավորման փուլից: Այսպիսով, հունահռոմեական ըմբշամարտի Հայաստանի պատանիների հավաքականն ավարտեց մրցելույթներն աշխարհի առաջնությունում: Մեր թիմը նվաճեց մեկ բրոնզե մեդալ:
