Վերջին ժամանակաշրջանում Ադրբեջանի ագրեսիվ հռետորաբանությունը, լայնամասշտաբ զորավարժությունները, ԵԱՀԿ-ի կողմից առաջարկվող մշտադիտարկման մեխանիզմներից հրաժարվելը ոչ այլինչ են, քան ակնհայտ վկայություն այն մասին, որ այս ամենը նախապես ծրագրված հսկայածավալ սադրանք է:
Այս մասին ԱԺ հատուկ նիստին հայտարարեց ԱԺ «Իմ քայլը» խմբակցության ղեկավար Լիլիթ Մակունցը՝ նշելով, որ դա ուղղակիորեն վտանգում է տարածաշրջանային խաղաղությունն ու անվտանգությունը:
«Հուլիսյան մարտերը ՀՀ պետական սահմանին այս ամենի համատեքստում արձանագրում են, որ Ադրբեջանի համար սրանք ոչ միայն Իլհամ Ալիևի՝ բռնապետական իշխանությունը պահելու աղիողորմ ճիգեր են, այլ առաջին հերթին մի ամբողջ ժողովրդի նկատմամբ ատելության հիմքով մահաբեր ագրեսիայի կիրառում՝ էթնիկ բնաջնջման փորձով, որին մեր արձագանքը միանշանակ է՝ Արցախի հարցի՝ ռազմական ճանապարհով լուծման ցանկացած փորձ հանդիպելու է ողջ հայ ժողովրդի կողմից համարժեք պատասխանի»,- ասաց նա:
Նա կոչով դիմեց կանանց ու մայրերին՝ ասելով. «Անհրաժեշտության դեպքում լինելու ենք մեր զինվորների կողքին առաջնագծում: Մի անգամ չէ, որ պատմության ընթացքում ցույց ենք տվել, որ տոկուն ենք մեր հայրենիքը անառիկ պահելու և հաղթանակներ գրանցելու հարցում»:
Հիշեցնենք, որ այսօր ադրբեջանական զինուժն Արցախում լայնածավալ հարձակում է սկսել։ Պաշտպանության բանակի ստորաբաժանումների կողմից ոչնչացվել են հակառակորդի 4 ուղղաթիռ, շուրջ 15 ԱԹՍ, այդ թվում՝ հարվածային, 10 տանկ և հետևակի մարտական մեքենա։ Ադրբեջանական կողմը նույնպես ունի մարդկային կորուստներ։ Հայաստանում և Արցախում հայտարարվել է ռազմական դրություն, ռազմական գործողությունները շարունակվում են։
