Ֆինլանդիայի գիտնականներն անիմացիոն տեսանյութ են հրապարակել, որում ցուցադրվում է, թե ինչպես նոր տեսակի կորոնավիրուսի կաթիլները կարող են տարածվել սուպերմարկետում և գնորդներին վարակել, հայտնում է Daily Mail պարբերականը։
Ֆինլանդիայի Աալտոյի համալսարանի փորձագետները համացանցում մեծ տարածում գտած տեսանյութը ստեղծել են՝ մարդկանց ցույց տալու հիվանդության տարածման ձևն ու դրանից առաջացող վտանգները։
«Կորոնավիրուսով վարակված անձը կարող է հազալ ու առաջ անցնել՝ հետևում թողնելով վիրուսը կրող չափազանց փոքր աերոզոլային մասնիկներ, որոնք այնուհետև կարող են հայտնվել մոտակայքում գտնվողների շնչուղիներում»,- նշել է Աալտոյի համալսարանի պրոֆեսոր Վիլլե Վուորինենը։
Տագնապ առաջացնող տեսանյութում ցուցադրվում է, թե ինչպես է սուպերմարկետում տղամարդը հազում, որից հետո «արտանետված» մասնիկներից հսկայական ամպ է գոյանում, որն այնպես է տարածվում, որ ունակ է անգամ գրեթե երկու մետր հեռավորության վրա գտնվող մարդուն վարակել:
Ֆինլանդիայի Աալտոյի համալսարանի, Ֆինլանդիայի օդերևութաբանական ինստիտուտի և Ֆինլանդիայի VTT տեխնիկական հետազոտությունների կենտրոնի գիտնականներն իրարից առանձին հետազոտել են տեսանյութում պատկերված նախնական իրավիճակը և բոլորն էլ միաբերան նշել, որ վարակման այդ սցենարն ամբողջովին իրատեսական է, և խորհուրդ են տվել խուսափել մարդաշատ վայրերում գտնվելուց։
