ՀՀ երկրորդ նախագահ, «Մարտի 1»-ի գործով մեղադրյալ Ռոբերտ Քոչարյանի նկատմամբ խափանման միջոց կալանավորումն ընտրելու վերաբերյալ Վերաքննիչ քրեական դատարանի՝ դեկտեմբերի 7-ին կայացրած որոշումը Ռոբերտ Քոչարյանի պաշտպանների կողմից բողոքարկվել է Վճռաբեկ դատարան: Այս մասին Armday.am-ի հետ զրույցքում ասաց փաստաբան Արամ Օրբելյանը:
«Բողոքը բավականին շատ հիմքերով է,107 էջից է բաղկացած. սկսած որոշման պատճառաբանությունից, դատարանի օրինականությունից, ավարտած ինչ-որ ընթացիկ խոստումներով: Երբ Վճռաբեկ դատարանը գործն ուղարկել է քննության, որոշակի պարամետրեր է սահմանել, որը մեր գնահատմամբ՝ Վերաքննիչ դատարանն այդ պարամետրտրերին էլ է հակասել: Ամենաշատը երեք ամիս ժամանակ կա վարույթ ընդունելու կամ մերժելու համար, որից հետո համապատասխանաբար պետք է ողջամիտ ժամկետում քննել»,-ասաց Ա. Օրբելյանը:
Նրա խոսքով՝ մինչև Նոր տարի պլանավորում են ներկայացնել նաև Եվրոդատարանի նոր բողոքը: Սահմանադրական դատարան բողոքները դեռևս վերջնականացված չեն որոշակի հետազոտությունների կարիք կա:
Օրբելյանը նշեց նաև, որ միջնորդություն կներկայացնեն գրավով փոխարինելու կալանքը, քանի որ մի շարք հանգամանքներ կան, որոնք վերաքննիչ դատարանի կողմից քննության չեն առնվում , այն պատճառաբանությամբ, որ դա դուրս է կալանքի բողոքարկման շրջանակներից:
Հիշեցնենք, որ Վերաքննիչ դատարանը՝ նախագահությամբ դատավոր Ռուբիկ Մխիթարյանի, մերժել էր ՀՀ երկրորդ նախագահ Ռոբերտ Քոչարյանի պաշտպանական թիմի բողոքները և անփոփոխ թողել առաջին ատյանի դատարանի հուլիսի 27-ի որոշումը՝ համաձայն որի Ռոբերտ Քոչարյանի նկատմամբ որպես խափանման միջոց էր ընտրվել կալանավորումը:
