Ընտրական օրենսգրքում փոփոխություններ կլինեն, որոնք ուժի մեջ կմտնեն Երևանի ավագանու ընտրություններին անդառաջ: Այս մասին ArmDay.am-ի հետ զրույցում ասաց Իրազեկ քաղաքացիների միավորում ՀԿ-ի համակարգող, Վարչապետին կից ընտրական օրենսգրքի բարեփոխումների հանձնաժողովի քարտուղար Դանիել Իոաննիսյանը:
Նշենք, որ Երևանի ավագանու ընտրությունները տեղի կունենան սեպտեմբերի 23-ին:
- Պրն.Իոաննիսյան ի՞նչ փուլում են Ընտրական օրենսգրքում փոփոխությունները:
- ՀՀ վարչապետին կից Ընտրական օրենսգրքի բարեփոխումների հանձնաժողովը մշակել է Ընտրական օրենսգրքում փոփոխություններ: Այն ներկայացվել է Կառավարություն, իսկ Կառավարությունն այն ուղարկել է ԱԺ, որտեղ սեպտեմբերի 6-ին քննարկման կդրվեն 24-ժամյա ռեժիմով: Շտապում ենք, որ դրանք ուժի մեջ մտնեն Երևանի ավագանու ընտրություներից առաջ:
-Ո՞րն է ամենակարևոր փոփոխությունը, և ինչու՞ եք այն կարևորում:
-Բարեգործությունները ընտրությունների քարոզարշավի ժամանակ միշտ արգելված են եղել, սակայն այն դիտարկվել է որպես վարչական իրավախախտում: Մենք այն դարձնում ենք քրեական: Ըստ իս, սա ամենակարևոր փոփոխությունն է ԸՕ-ում:
-Ո՞ր դեպքում է պատժի ավելի խիստ կիրառում նախատեսվում:
-Մենք խստացրինք պատիժը ընտրական հանցագործությունների համար, երբ այն կատարվում է կազմակերպված խմբի կողմից: Եթե խմբով է իրականացվում հանցագործությունը, դա շատ ավելի վտանգավոր է, նշանակում է այն նպատակ ունի իշխանությունը ժողովրդից գողանալու: Սա շատ լուրջ հանցագործություն է՝ ուղղված սահմանադրական կարգի դեմ: Մենք ցանկանում ենք մեղմացնել պատիժը հանցագործությունների համար, բաց նաև չենք ուզում, քանի որ դա բռնապետության ճանապարհով գնալու է նմանվում:
-Դիտորդների և լրագրողների հետ կապված փոփոխություններ դիտարկվե՞լ են:
-Նորանոր հնարավորություն տրվեցին դիտորդներին, լրագրողներին, կուսակցություններին, որպեսզի կարողանան պայքարել ընտրախախտումների դեմ: Նախկինում, երբ նրանք տեսնում էին վարչական իրավախախտում, պետք է գնային ԿԸՀ, հետո այն քննարկումից հետո ուղարկվում էր դատարան և դա գործնականում դառնում էր անհնարին: Հիմա նրանք կարղ են միանգամից դիմել դատարան և պահանջել, որ պատասխանատվության ենթարկվի ընտրական գործընթացում վարչական իրավախախտում գործած անձը:
Հեշտացվել է նաև լրագրողների և դիտորդների հավատարմագրումը: Վերացվում են որոշ սամանափակումներ: Նախկինում ընտրատեղամասում կարող էր առավելագույնը 15 դիտորդ լինել, այժմ առավելագույն թիվ չի սահմանվում և ներկա կլինեն այնքան, որքան կլինեն:
-Ընտրատեղամասում գտնվելու իրավունք չունեցող մարդկանց ԸՕ-ի նոր փոփոխություններով ի՞նչ է սպասվում:
-50 հազար դրամի չափով կտուգանվեն այն անձինք, ովքեր իրավունք չունեն գտնվել ընտրատեղամասում, սակայն, պարբերաբար ,հայտնվում են: Զգուշացումից հետո չհեռանալու դեպքում նրանք կտուգանվեն: Կտուգանվեն նաև անվանաքարտ չկրելու դեպքում, որը կլինի 20.հազար դրամի չափով:
-Զինծառայողների ընտրության հետ կապված ի՞նչ կասեք:
-Այս փաթեթում ոչ, սակայն մենք մտադիր ենք Ընտրական օրենսգրքում փոփոխության ենթարկել զինծառայողների շրջանում քարոզչությունն ավելի լավ կանոնակարգելը: Նրանք պետք է հավասարապես տեղեկանան կուսակցությունների գաղափարներին, խոսքին և ձեռք բերեն այն ինֆորմացիան, որով պետք է որոշում կայացնեն: Ընտրելու հետ կապված ևս փոփոխություն կլինի: Նրանց քվեարկության ընթացքում վերադաս սպա պետք է տեղամասում չլինի:
-Շրջիկ արկղերը ևս ընտրախախտումներ անելու մեծ ռիսկեր են պարունակում, փոփոխություններ նախատեսվա՞ծ են:
-Շրջիկ արկղերի հետ կապված փոփոխություններ չեն լինի:
-Տեխնիկական մասով ի՞նչ փոփոություններ կլինեն:
-Գրիչը կհանվի քվեախցիկից: Ընտրողը պարզապես կընտրի քվեաթերթիկներից մեկն ու կդնի ծրարի մեջ՝ առանց նշման, որը նաև անվավեր լինելու վտանգից կազատի:
-Սովորաբար, ընտրատեղամասում իրարանցում է ստեղծվում, երբ գործը հասնում է ընտրողին օգնություն ցուցաբերելուն: Այստեղ փոփոխություններ կա՞ն:
-Օգնություն ցուցաբերելու հետ կապված այո, փոփոխություններ կլինեն.Մեկ մարդը կարող է առավելագույնը մեկ ընտրողի օգնել. Թե չէ ստացվում է, որ մեկ անձը 5 տատիկ-պապիկ է ունենում:
