Կեմերովոյում ապրող հայտնի բլոգեր Միլենա Պետրոսյանը բախվել է ատելության մեծ ալիքի՝ իր ամուսնու՝ Թաթուլ Պետրոսյանի ինքնասպանությունից հետո։ Երկու շաբաթ լռելուց հետո միայն վերջերս նա սկսել է խոսել։
25-ամյա Միլենա Պետրոսյանը, ում մեղադրում են Թաթուլին նրա մտերիմ ընկերոջ՝ Արթուրի հետ դավաճանելու մեջ, հորդորել է հանրությանը՝ չշտապել եզրակացություններ անել իր ընտանիքի վերաբերյալ։«Քանի որ մեծ ցանկություն կա խորանալու մեր անձնական կյանքի մանրամասների մեջ, կարծում եմ՝ կարևոր է նշել, որ ես և ամուսինս՝ Թաթուլը, վերջին երեք ամիսների ընթացքում գտնվում էինք ամուսնալուծության գործընթացում»,-գրել է նա ու ավելացրել. «Ի՞նչ իրավունք ունեք ցեխ շպրտելու և դատողություններ անելու։ Այնքան շատ է խոսվում այն մասին, թե իբր մենք ընտանիք էինք, և որ ես սխալ քայլ եմ արել։ Բայց եկեք հաշվի առնենք մի փաստ. ի՞նչ էլ որ լիներ, մենք միևնույն է՝ մնալու էինք ընտանիք՝ անկախ նրանից՝ միասին էինք ապրում, թե ոչ։ Մենք միշտ հարազատներ էինք մնալու։ Վեց տարվա ամուսնություն, երկու երեխա»,-նշել է նա։
Միլենան նաև խորհուրդ է տվել բոլորին կենտրոնանալ իրենց և իրենց հարազատների վրա՝ նշելով, որ ամենահեշտը ուրիշներին դատելն է։«Մեր ընտանիքը մերն է, և ամեն ինչ միշտ կմնա մեր միջև։ Արդյո՞ք փորձեցինք փրկել մեր ամուսնությունը։ Այո՛։ Ստացվե՞ց։ Ո՛չ։ Բայց ապագայում ամեն ինչ դեռ կարող էր փոխվել։ Երկու կողմի ընտանիքներն էլ փորձում էին օգնել մեզ, որպեսզի թույլ չտանք, որ ամուսնությունը քանդվի։ Բոլորը տեղյակ էին մեր ամուսնալուծության մասին։ Բայց, ցավոք, երբեմն դժվար է կոտրված ափսեի կտորները նորից իրար միացնել։ Այժմ իմաստ չունի կենտրոնանալ դրա վրա։ Պարզապես մի բան հիշեք՝ ցանկացած ընտանիքում մարդիկ վիճում են, հաշտվում, սիրում միմյանց և զայրանում։ Սերը կարող է բռնկվել, մարել, իսկ հետո՝ կրկին բռնկվել։ Կենտրոնացեք ձեր սեփական կյանքի և ընտանիքների վրա։ Յուրաքանչյուր ընտանիք անցնում է տարբեր իրադարձությունների և իրավիճակների միջով։ Մի՛ դատեք ուրիշներին. ոչ ոք չի պատմի, թե ինչ է կատարվում փակ դռների հետևում»,-ասել է բլոգերը։
Ըստ Միլենա Պետրոսյանի՝ նա անկեղծորեն սիրում էր ամուսնուն և հաճույք էր ստանում բացահայտորեն ցուցադրել իր զգացմունքները նրա հանդեպ։ Երբ ընտանիքը քանդվել է, Միլենան դադարել է այդպիսի ջերմություն դրսևորել։
«Մենք պարզապես կիսվում էինք մեր սիրով այնպես, ինչպես այն իրականում կար։ Հենց որ մեր հարաբերություններում խնդիրներ առաջացան, ես դադարեցի ցուցադրել այդ երջանիկ պատկերը, և շատերը դա նկատել էին վաղուց։ Խնդրում եմ, մի՛ դադարեք հավատալ սիրուն։ Կրկին ուզում եմ ասել շնորհակալություն՝ ձեր աջակցության համար. դա ինձ համար շատ մեծ նշանակություն ունի»,-նշել է նա։
