«Համոզված եմ՝ այս տեսանյութը դիտելու եք, բայց համոզված չեմ, որ կամաչեք». Ալիկ Ալեքսանյանն իշխանությանը հիշեցնում է՝ Ստեփանակերտում ադրբեջանցիները քանդել են Սուրբ Աստվածամոր եկեղեցին

Գանձասարը, Ամարասը, Դադիվանքը, մեր գերեզմանները, սրբավայրերը թշնամուն հանձնած իշխանությունը, որն Ադրբեջանի հետ «խաղաղություն» է քարոզում, չի պատրաստվո՞ւմ արձագանքել նույն այդ Ադրբեջանի կողմից Ստեփանակերտի Սուրբ Աստվածամոր եկեղեցին քանդելու փաստին, ֆեյսբուքյան ուղիղ եթերում հարց է բարձրացրել «Ուժեղ Հայաստան» կուսակցության անդամ Ալիկ Ալեքսանյանը։

«Դա մեծ ցավ է մեզ համար։ Իսկ ինչո՞վ է զբաղված Նիկոլ Փաշինյանն այդ ընթացքում. եկեղեցու մոմն է ուզում հարկել, նվիրատվությունն է ուզում հարկել։ 380 եկեղեցի, 60 վանական համալիր, 2385 խաչքար, 400 միջնադարյան գերեզմանոց, 181 գյուղ ու 12 քաղաք հանձնած Նիկոլ Փաշինյանը կոպեկ հարկող վարչապետ է»,- ասել է Ալեքսանյանը։

«Երեկ, երբ այս գույժը լսեցինք, գիտե՞ք ՀՀ արտգործնախարարը ինչով էր զբաղված. սուրճ էր խմում, լրահոսին էր հետևում։ Համոզված եմ՝ այս տեսանյութն էլ է դիտելու, բայց համոզված չեմ, որ դիտելուց հետո մոտն ամոթ կառաջանա ու որևէ արձագանք կանի այս հարցին»,- հավելել է նա։