Գոհ եմ կառավարության արված աշխատանքից, ԱԺ-ում 2026թ.-ի բյուջեի նախագծի եզրափակիչ ելույթում հայտարարեց վարչապետ Նիկոլ Փաշինյանը։
«Այս գումարման ԱԺ-ի հետ մեր աշխատանքն, ընդհանուր առմամբ, լավ եմ գնահատում և, ընդհանուր առմամբ, գոհ եմ կառավարության արված աշխատանքից, իհարկե, գերազանց չեմ գնահատում, ուզում եմ ասեմ՝ լավ»,-ասաց նա։
Փաշինյանը նշեց, որ վստահ են՝ 2025թ.-ի բյուջեի հարկային եկամուտները 2017թ-ից ավելին կլինեն 1 տրիլիոն 542 մլրդ դրամով, կամ 133 տոկոսով։ «Այս տարվա մեր բյուջեի հավելյալ ավելացած մասն ավելին է, քան 2017-ի ընդհանուր բյուջեն»,-ասաց նա։
Փաշինյանի խոսքով՝ խոստումը, որ միջինը 7 տոկոս տնտեսական աճ են ապահովելու, վստահաբար, կատարվել է։
«ՀՆԱ-ն աճել է 36,6 տոկոսով, սա շատ լավ ցուցանիշ է»,-ասաց նա։
Իսկ թե ինչքանով է այս ցուցանիշները ազդել բնակչության կենսամակարդակի վրա, ասաց, որ «Ջինի գործակցի»-վերջին ցուցանիշներով ՀՀ-ն էական բարելավում է ունեցել։ «Երկրում գեներացվող գումարները, արդյունքի բաշխումը հնարավորինս հավասար և արդար տեղի է ունենում»,-ասաց նա։
Փաշինյանը հավելեց, որ 2018-ից ի վեր՝ իրենք ՀՀ-ում ստեղծել են 223 895 աշխատատեղ. «Նման ցուցանիշ նման ժամանակահատվածի համար ՀՀ պատմության ընթացքում երբեք չի եղել»։
Նա շեշտեց՝ չի եղել ՀՀ-ում 76 տոկոսանոց գնաճ, աշխատավարձերի աճը երկնիշ է եղել՝ 20 տոկոսից ավելի, որը ցույց է տալիս քաղաքացիների բարեկեցության մակարդակը։
«Մենք 2018-2025 թվականը ՀՀ քաղաքացիներին 384 մլրդ դրամ ենք վերադարձրել եկամտահարկի միջոցով, ուղղակի տվել ենք քաղաքացիներին։ Այս ամենը ցույց է տալիս, որ ՀՀ-ն գտնվում է զարգացման ուղեծրի վրա»,-ասաց նա։
