«Մենք հասցրել ենք արդեն քննարկում անցկացնել, ինչպես ինքն է նշում, իր հոտի ներկայացուցիչներով: Եվ հիմա ձեզ ասում եմ՝ որպես արցախցիներից մեկը, որ միանշանակ ընդունելի չէ նրա կողմից որևէ փաստարկ ու արդարացում: Ժողովրդի մեջ քննարկումներում բացարձակ չի ընկալվում իր արածն ու ասածը »,- Aysor.am-ին ասաց Արցախի պատգամավոր Մետաքսե Հակոբյանը՝
անդրադառնալով Արցախի թեմի առաջնորդ Վրթանես Սրբազանի պարզաբանումներին, թե ինչու էր գնացել Նիկոլ Փաշինյանի հետ հանդիպման:
Պատգամավորը Aysor.am-ին պատմեց, որ արցախցիներով Վրթանես եպիսկոպոս Աբրահամյանի քայլերը քննարկելիս՝ շոշափել են նաև նրա կարգալուծության կամ թեմի առաջնորդությունից հեռացնելու հարցը Վեհափառ Հայրապետի մոտ բարձրացնելու հնարավորությունը.
«Իհարկե, եղել են նաև այդպիսի քննարկումներ, բայց արդյունքում որոշել ենք չխառնվել եկեղեցու գործերին: Դա կաթողիկոսի իրավասության ներքո է։ Սակայն անկախ ամեն ինչից՝ Վրթանես եպիսկոպոս Աբրահամյանը այլևս չի կարող թեմի առաջնորդումը շարունակել: Թե դա ինչ ձևով կլինի, այս պահին չեմ կարող ասել»։
Մետաքսե Հակոբյանի խոսքով՝ իրենք որոշում ունեն ՝ չնմանվել այս իշխանություններին և զրպարտանքի հրապարակային խոսքեր չուղղել Վրթանես եպիսկոպոս Աբրահամյանի հասցեին՝ հաշվի առնելով նաև, որ նա հոգևորական է, բայց նրա քայլերը պետք է բխեն արցախցիների շահերից.
«Իր ցանկացած քայլ ու շարժում չի կարող առանձին լինել Արցախի ժողովրդից։ Եթե իրեն պահել է այդ կերպ, ստացվում է՝ ցույց է տվել արցախցիների դիրքորոշումը, ինչը ոչ մի կերպ իրականությանը չի համապատասխանում: Ինչպե՞ս կարող է ինքն առանձին եպիսկոպոսական կարծիք ունենալ, արցախցիներն՝ առանձին ունենան, ու ինքը լինի Արցախի թեմի առաջնորդը: Նրա ոչ մի արդարացում չի ընկալվել ու չի ընկալվելու»:
