Նիկոլ Փաշինյանի հետ հանդիպման գնացած ութ բարձրաստիճան հոգևորականների թվում էր նաև Արցախի թեմի առաջնորդ Վրթանես եպիսկոպոս Աբրահամյանը: Փաշինյանի հետ նրա հանդիպումը տարակուսանք և տարընկալում էր առաջացրել հատկապես արցախցիների շրջանում: Փաստաբան Ռոման Երիցյանը ֆեյսբուքյան իր էջում գրեց, որ Արցախի թեմի առաջնորդ Վրթանես Սրբազանի հանդիպումը Փաշինյանի հետ, ձեռքը սեղմելը և հատկապես խոնարհվելը խորը ցավ ու զայրույթ է առաջացրել:
Այսօր Վրթանես Սրբազանը հայտարարություն է տարածել ու նշել, որ Փաշինյանի հետ հանդիպմանը ինքը մասնակցել է որպես Մայր Աթոռի եպիսկոպոսաց հանձնախմբի անդամ, և այն որևէ առնչություն չունի և չի կարող ունենալ Արցախի հիմնախնդրի և հայրենակիցներին հուզող հիմնահարցերի հետ։
24News-ի հետ զրույցում փաստաբան Ռոման Երիցյանն անդրադարձավ Սրբազանի հայտարարությանը:
«Իսկ արցախցիներն ընդունու՞մ են նման հոգևոր առաջնորդին: Ո՞նց կարող ենք մենք առաջնորդ ընդունել այն մարդուն, ով որ Արցախի հանձնման քաղաքական գործընթացի պատասխանատու, Արցախի բոլոր սրբավայրերը Ադրբեջան համարող, Արցախի եկեղեցիների քանդման գործընթացին «թքած ունեմ» վերաբերմունք ցուցաբերող, համայն հայության հոգևոր առաջնորդին ավազանի անունով դիմողի հետ է հանդիպում: Այդ նույն տրամաբանությամբ էլ կարող է Ալիևի հետ հանդիպել և ասել` ես հավատարիմ եմ: Ախր, գործողություններն ավելի քան պարզ վկայում են այն իրականության մասին, ինչը գոյություն ունի: Ես երբեք չեմ կարող առաջնորդ ընդունել այն անձին, որը խոնարհվում է ՀՀ վարչապետի առաջ, այսինքն, այն անձի առաջ, որը իմ հայրենիքը, իմ ծննդավայրը համարում է Ադրբեջան: Ես նման անձին չեմ կարող առաջնորդ և մանավանդ հոգևոր առաջնորդ համարել»,-նշեց զրուցակիցը:
Երիցյանն ասաց, որ նույնիսկ Վրթանես Սրբազանը բարոյական իրավունք չունի ինքն իրեն հոգևոր առաջնորդ համարել:
Անդրադառնալով Սրբազանի հայտարարության այն հատվածին, որտեղ ասվում է, որ ինքը համոզված է, որ արցախահայերի հետ միասին կշարունակեն պայքարը հանուն ոտնահարված իրավունքների պաշտպանության և հայրենիք վերադառնալու բաղձալի երազանքի իրականացման, Ռոման Երիցյանը հարց հնչեցրեց. «Վերադարձ ու՞մ հետ. Փաշինյանի հե՞տ միասին, թե՞ մեր հետ: Մեր պայքարը լրիվ այլ ձևով է արտացոլվում: Մեր պայքարը չի արտացոլվում գերիների հարցում անտարբերությամբ: Մեր պայքարը չի արտացոլվում Եվրոպական դատարան ներկայացրած հայցերի հետկանչմամբ, ՄԻՆՍԿ-ի խմբի լուծարմամբ: Մեր պայքարը չի արտացոլվում Արցախի էջը փակելով և դրա մասին այլևս չխոսելով: Եթե մեր հետ միասին է պայքարում, ապա մեր գաղափարներով պետք է առաջնորդվի: Ավելի ճիշտ, ինքը պետք է այդ գաղափարները առաջ քաշեր, մենք էլ դրանով առաջնորդվեինք»:
Ըստ նրա, Վրթանես Սրբազանը չի կիսում իր թվարկած գաղափարները, քանի որ, իր խոսքով, խոնարհվել է Փաշինյանի առաջ:
«Ես չեմ կարող Նիկոլ Փաշինյանի պես ավազանի անունով դիմել նրան կամ ասել, որ ինքը Սրբազան չէ, որովհետև դա իմ որոշման ենթակա հարց չէ: Ես հարգում եմ Եկեղեցին և եկեղեցական կանոնները, բայց ես իմ կարծիքը արտահայտելու իրավունք ունեմ և այդ անձին իմ հոգևոր առաջնորդը չեմ համարում, և չեմ կարծում, որ նա ճիշտ կամ բարոյական որոշում է կայացրել, ոչ միայն իմ, այլ նաև ինքն իր նկատմամբ»,- նշեց փաստաբան Ռոման Երիցյանը:
