«Թալինի Սուրբ Աստվածածին եկեղեցում երեկվա պատարագին խոստովանության կարգը կատարեց մի նախկին քահանա՝Վարդան Հունանյանը, որը մեղքերի թողություն տալու իշխանություն չունի»,- Aysor.am-ին ասաց Բյուրականի Սուրբ Հովհաննես եկեղեցու հոգևոր սպասավոր Տեր Վրթանես քահանա Բաղալյանը:
«Այսինքն՝ այդ բոլոր հաղորդվողները, որոնք երեկ պատարագին հաղորդվեցին, իրենք առանց խոստովանության հաղորդություն են ստացել, որովհետև Վարդան Հունանյանը ի զորու չէ մեղքերի թողություն տալու, շնորհազուրկ քահանա է նախկին: Երեկվա պատարագն էլ շատ օրինական չէ այդ առումով»,- ասաց Տեր Վրթանեսը:
Նա պատմեց՝ ինչու է Վարդան Հունանյանը կարգալույծ արվել.
«Խնդիրը մոտ երկու տարվա է, որ վերջապես Մայր Աթոռը նրան կարգալույծ արեց: Այս մարդն իր կնոջից առանձին էր ապրում: Այն իր ասածը, թե «արձակուրդում եմ», Բագրատ Սրբազանը նրան ոչ թե արձակուրդ էր տվել, այլ ասել էր ՝գնա, կնոջդ հետ կհաշտվես, կվերադառնաս, կներեմ: Այդ վիճակով, կոպիտ ասած, դու քահանա չես»:
Իսկ Թալինի պատարագը, ըստ Տեր Վրթանեսի, հակականոնական չէ, քանի որ պատարագն անցկացրած Տեր Թադե քահանա Թախմազյանը դեռ կարգալույծ չի արվել:
Հիշեցնենք, որ Տեր Թադեն էլ է միացել հակաեկեղացական արշավին, իր աջակցությունն է հայտնել Հովհաննավանքի կարգալույծ քահանային՝ Ստեփան Ասատրյանին:
