Ազգային ժողովի նախագահ Ալեն Սիմոնյանը համաձայն չէ այն պնդումների հետ, որ իրենք ասոցացվում են մահի ու արյան հետ։
«Սխալ են ասում»,- լրագրողների հետ զրույցում հայտարարեց նա։
Սիմոնյանը հայտարարեց՝ անկախ նրանից՝ իշխանությունը կապ ունի, թե չունի Փարաքարի սպանությունների հետ՝ այո՛, դա ենթադրում է պատասխանատվության աստիճան։
«Այո՛, իրավապահները պետք է հետևություններ անեն։ Պարզ է, որ դեպքը կապված է միջանձնային հարաբերությունների հետ, կապված չէ քաղաքական դիրքորոշման հետ»,- նշեց նա։
ԱԺ նախագահի խոսքով՝ այն, ինչ տեղի է ունեցել Փարաքարում, «կատերգորիկ վատ է»։
«Շատ ցավում եմ, ևս մեկ անգամ ցավակցում եմ զոհվածների հարազատներին ու համարում եմ, որ մեր իրավապահները ժամանակ ունեն, առնվազն շատ արագ պետք է բացահայտեն»,- ասաց նա։
Հիշեցնենք՝ սեպտեմբերի 23-ին՝ ժամը 23.52-ին, ՆԳՆ ոստիկանություն ահազանգ էր ստացվել, որ Արմավիրի մարզի Մերձավան բնակավայրի Երևանյան խճուղում կրակոցներ են հնչել։
Մահացածներից մեկը Փարաքար համայնքի ղեկավար Վալոդյա Գրիգորյանն էր, երկրորդ զոհը քրեական ոստիկան Կարեն Աբրահամյանն էր:
ՆԳՆ մամուլի խոսնակ Նարեկ Սարգսյանը հայտնել էր, որ ոստիկանը ծառայության մեջ չի եղել, պարզապես այդ պահին Վալոդյա Գրիգորյանի հետ է եղել. նրանք ընկերական հարաբերություններ են ունեցել:
Մերձավանի կրակոցների և սպանությունների դեպքի առթիվ նախաձեռնվել է քրեական վարույթ։
Նշենք, որ վիրավորում էր ստացել նաև նրանց հետ գտնվող երրորդ անձը, որը վիրահատվել է, կյանքին վստանգ չի սպառնում։
