Ռուսաստանի հայերի միության նախագահ Արա Աբրահամյանը ՏԱՍՍ-ին տված հարցազրույցում ասել է, որ ինքը կօգնի միավորել Հայաստանի այն քաղաքական ուժերը, որոնք դեմ են գործող վարչապետ Նիկոլ Փաշինյանին 2026 թվականի խորհրդարանական ընտրություններում։
«Չնայած ես մտադիր չեմ մասնակցել առաջիկա ընտրություններին, այնուամենայնիվ, ես կօգտագործեմ իմ բոլոր հնարավորությունները՝ օգնելու միավորել առողջ ուժերին, որոնք ունակ են առկա տնտեսական և մարդկային ներուժը, այդ թվում՝ սփյուռքը, հետևողականորեն և հայրենիքի հանդեպ սիրով օգտագործել Հայաստանը վերակենդանացնելու համար»,-ասել է նա։
Աբրահամյանը նշել է, որ Փաշինյանի կառավարությունը կորցրել է Արցախը (ԼՂՀ), երկրի ամենակարևոր օբյեկտների նկատմամբ վերահսկողությունը փոխանցում է օտարերկրացիներին, մեծացնում է Հայաստանի պարտքը և նպաստում է գների բարձրացմանը։
«Վերջին յոթ տարիների պատմությունը տխուր վկայություն է այն բանի, թե ինչպես է Փաշինյանը, զգացմունքների մանիպուլյացիայի միջոցով, իրեն հավատացող մարդկանց չիմացությամբ նրանց դարձրել խաբեության և ազգային ողբերգության մեղսակիցներ, որոնց մենք այսօր ականատես ենք լինում»,-հավելել է նա։
Աբրահամյանը նաև նշեց, որ հայերի մեծամասնությունը սիրում է իր հայրենիքը և պատրաստ է միավորվել դրա պահպանման և բարգավաճման համար։
«Եվ մենք պետք է շփվենք նրանց հետ, ովքեր սխալվում են, բացատրենք նրանց մի պարզ բան, որ կարելի է կորցնել բիզնեսը, բայց սկսել զրոյից և հարստանալ, կարելի է կորցնել և նորից ընկերներ գտնել, բայց նա, ով կորցնում է հայրենիքը, կորցնում է ամեն ինչ»,-հավելեց Ռուսաստանի հայերի միության նախագահը։
Ռուսաստանի հայերի միության նախագահը իր հողամասը Երևանի կենտրոնում բռնագրավելու որոշումը քաղաքական պատվեր է անվանել։
«ՀՀ կոռուպցիայի դեմ պայքարի դատարանի որոշումը անօրինական է և ունի քաղաքական պատվերի բնույթ», - ասել է նա ՏԱՍՍ-ին։
«Այս հողամասը ես՝ որպես օտարերկրյա ներդրող, ձեռք եմ բերել պետությունից աճուրդի միջոցով քառորդ դար առաջ՝ խստորեն պահպանելով Հայաստանի օրենսդրությունը։ Հողամասի ենթադրյալ «անօրինական մասնավորեցման» վերաբերյալ իր որոշմամբ՝ հատուկ ստեղծված կոռուպցիայի դեմ պայքարի դատարանը կրկին հաստատեց, որ այն Փաշինյանի գրպանի դատական մարմինն է, նրա պատժիչ մահակը կիրառվում է նրանց դեմ, ովքեր համաձայն չեն ներկայիս իշխանությունների՝ Հայաստանի և հայ ժողովրդի նկատմամբ լիակատար անտարբերության քաղաքականության հետ»։
Աբրահամյանը հավելեց, որ բիզնեսի սեփականատերերի դեմ պայքարի նման մեթոդները, վերջին հաշվով, պատիժ են բոլոր քաղաքացիների համար, քանի որ այս րոպեական «սխրանքները» զրկում են Հայաստանին հեռանկարներից, նոր աշխատատեղերից և լուրջ վնաս են հասցնում Հայաստանի ներդրումային հեղինակությանը. չէ՞ որ բիզնեսին անհրաժեշտ է հստակ և կայուն պլանավորման հորիզոն»։
Աբրահամյանը նաև նշել է, որ չի պատրաստվում փոխել իր համոզմունքները նման ճնշման փորձերի պատճառով։
«Արժի՞, որ ես նեղվեմ այս կառավարության կողմից իմ հողամասը խլելու որոշումից, հաշվի առնելով, որ մեզանից խլում է անգինը՝ մեր հայրենիքը, մեր պատմությունը, մեր հիշողությունը, մեր ավանդույթներն ու քրիստոնեական հավատքը, մեր Արցախը՝ իր հին տաճարներով, մեր Սյունիքն ու Զանգեզուրը՝ իրենց հերոսական անցյալով», - ասաց նա։
Վերջին շաբաթներին Արա Աբրահամյանը մի շարք հարցազրույցներ է տվել, որոնցում քննադատել է վարչապետ Նիկոլ Փաշինյանի կառավարությունը։ Այս ֆոնին Հայաստանի կոռուպցիայի դեմ պայքարի դատարանը որոշել է բռնագրավել նրա Երևանի հողամասը։
