Բաներ կան, որ մենք մտածում ենք, բայց դրա մասին չի ստացվում բարձրաձայնել, կառավարության նիստին «Ոստիկանությունում ծառայության մասին օրենքում փոփոխություններ և լրացումներ կատարելու մասին» օրենքի նախագիծը քննարկելիս հայտարարեց վարչապետ Նիկոլ Փաշինյանը։
«Օրինակ, երբեք չեմ հասկացել, թե ինչու 36 տարեկանին չի կարելի ոստիկանությունում ծառայության մտնել։ Արդեն 7 տարի է՝ ես այդ մասին մտածում եմ, ու քննարկում ենք՝ այս որոշումն ինչու է այսքան ձգվում։ Պարեկային ոստիկանության հիմնադրման ընթացքում բոյի խնդիր առաջացավ։ Մենք եկանք ու ասացինք, որ եթե դուք այսքան հասակ ունեք, ձեզ կարող ենք պարեկային ոստիկանությունում աշխատանքի ընդունել, եթե այդ հասակից ցածր եք՝ չենք ընդունում։ Ես այստեղ շատ մեծ դիսոնանս եմ տեսնում։ Այդ մարդը ծնվել է այդքան, եթե իր բոյը 1.40 է, նա ոչ մի օբյեկտիվ բան չի կարող անել, որ իր բոյը դառնա 1.57»,-ասաց Փաշինյանը։
Նա նշեց, թե մյուս կողմից էլ զինվորական ծառայության մեջ տեսնում է մարդկանց, որոնք քաշի ստանդարտներն անգամներով գերազանցում են, սակայն նրանց ոչինչ չեն ասում։
«Հիմա բնությունը էդ մարդուն ըտենց ա ստեղծել՝ 1.49, ու մենք ասում ենք, թե քեզ չենք ընդունում աշխատանքի։ Խնդրում եմ ճիշտ հասկանալ, որովհետև ես ինքս էլ ավելորդ քաշից տառապող մարդ եմ։ Սա մեր մտածողության ձևերի դեֆորմացիաների մասին է։ Եթե բոյի ստանդարտը չենք հանել, պետք է հանենք»,-ասաց Փաշինյանը։
