Մարդկանց իրավունքների պաշտպանության հարցը պետք է օրակարգային կարևոր թեմա լինի։ Այս մասին արցախցիների ինքնաբուխ հավաքի ընթացքում ասաց Արցախի ՄԻՊ Գեղամ Ստեփանյանը։
«2023 թվականի սեպտեմբերից հետո կառավարության կողմից վարվում է Արցախի թեման փակելու քաղաքականություն։ Եվ մեր իրավունքները ոչ միայն սոցիալական իրավունքներ են, մեր իրավունքները նաև մեր վերադարձի իրավունքն է, գերիների տունդարձի վերադարձի իրավունքն է, Արցախում պատմամշակութային ժառանգության պահպանման իրավունքն է, և սրանք կարևոր հարցեր են, որոնք որ մենք ակնկալում ենք, որ Հայաստանի Հանրապետության կառավարությունը իր ամենօրյա գործունեության մեջ առաջ կմղի, հետամուտ կլինի, ինչը, ցավոք սրտի, էս ամբողջ ժամանակահատվածում չենք տեսել»,- ասաց նա։ Նա նշեց, որ Արցախ վերադարձի պահանջն արդարացի քաղաքական պահանջ է։
«Արցախի ժողովրդի իրավունքների անկյունաքարը Արցախի ժողովրդի վերադարձն է։ Որևէ կաշկանդվածություն չկա, չի կարող լինել, և ես նաև նշել եմ նաև իմ ելույթում, որ մենք գործ ունենք ոչ թե ինչ-որ հեքիաթային պատումի հետ, մենք գործ ունենք իրավունքի հետ, որը ամրագրված է Արդարադատության Միջազգային Դատարանի որոշմամբ, որը ամրագրված է, ամրագրվում է ամենօրյա ռեժիմով տարբեր պետությունների կողմից ընդունվող հայտարարություններով։ Եվ պետք է բարի լինի Հայաստանի Հանրապետության կառավարությունը, որպես մի երկիր, որը 30 տարի շարունակ հանդես է եկել որպես Արցախի ժողովրդի իրավունքների երաշխավոր, իր օրինակով էս հարցը բանակցային օրակարգում պահել։ Չկա կաշկանդվածություն, կարևոր չէ էլ, ես սա ասելու եմ, ինչ ուզում է լինի, ես սա ասելու եմ։ Որտե՞ղ է իմ իրավունքը, 150.000 մարդու իրավունքները։ 150.000 մարդ ամեն օր քնում և զարթնում է իր իրավունքի, իր վերադարձի բաղձալի երազանքով և նպատակով։ Վերջ։ Ինչպես փակենք մի բան, որը ըստ էության մեր ինքնությունն ու մեր էությունն է կազմում։ Այս երբ որ հասկանան էդ ամեն ինչը, արդեն կսկսեն քայլեր ձեռնարկել»,- ընդգծեց Ստեփանյանը։
Հիշեցնենք, որ ՀՀ կառավարությունից հրավիրել են Արցախցիների իրավունքների պաշտպանության խորհրդի ներկայացուցիչներին՝ այսօր հանդիպելու փոխվարչապետ Տիգրան Խաչատրյանի հետ և քննարկելու մեր պահանջները: Մինչև կառավարությունում կանցկացվի հանդիպում, արցախիցներն ինքնաբուխ հավաքվել են կառավարության մոտ՝ հանրայնորեն վերահաստատելու իրենց պահանջները:
