Բռնի տեղահանված արցախցիները մարտի 29-ից հանրահավաք ու բողոքի գործողություններ են իրականացնում՝ ․ՀՀ կառավարությունից պահանջելով չոտնահարել իրենց իրավունքները, բանակցային օրակարգում պահել բռնի տեղահանվածների՝ Արցախ հավաքական վերադարձի հարցը, քայլեր ձեռնարկել գերիների վերադարձի ուղղությամբ, ինչպես նաև չկասեցնել սոցիալական նպաստի տրամադրումը։
Պահանջագիրն արցախցիները մարտի 29-ին էին հանձնել կառավարությանը, ինչպես նաև ՀՀ գործող իշխանությանը մեկ շաբաթ ժամանակ էին տվել՝ պատասխանելու իրենց բարձրացրած պահանջներին։
Այսօր փոխվարչապետ Տիգրան Խաչատրյանը հանդիպել էր Արցախցիների իրավուքների պաշտպանության խորհրդի անդամների հետ, նրանց ներկայացրել կառավարության դիրքորոշումը։
Հանդիպումից հետո խորհրդի անդամները կառավարության շենքի մոտ ինքնաբուխ հավաք իրականացնող արցախցիներին տեղեկացրին՝ փոխվարչապետն իրենց տեղեկացրել է, որ ՀՀ կառավարությունը չի պատրաստվում հետ կանչել իր որոշումը՝ արցախցիներին տրամադրվող «40+10» սոցիալական ծրագիրը դադարեցնելու վերաբերյալ։ Սոցիալական այս նպաստների տրամադրումը դադարեցվելու է, ինչպես որոշվել էր ավելի վաղ։ Կառավարությունից արցախցիներին փոխանցել են նաև առաջարկ՝ մյուս սոցիալական ծրագրերը քննարկելու նպատակով ձևավորել մասնագիտական խումբ ու միասին աշխատել։
Արցախցիների վերադարձի և մնացած խնդիրների առնչությամբ էլ նշել են՝ կառավարությունը կպատասխանի գրավոր։
Արցախցիներին ՀՀ գործող իշխանությունների դիրքորոշումն ու պատասխանը չի գոհացրել, այժմ քննարկում են իրենց հետագա գործողություններն ու քայլերը։
