Ապրիլյան քառօրյա պատերազմից հետո դասեր քաղվել են, և եթե չլիներ 2018 թվականի հեղափոխությունը, ապա կկարողանայինք դիմակայել 2020 թվականին Ադրբեջանի կողմից սանձազերծված պատերազմին, Եռաբլուրում 24News-ի թղթակցի հետ զրույցում ասաց Արցախի ԱԺ պատգամավոր Դավիթ Գալստյանը։
«Մենք դասեր քաղել էինք, կարճ ժամանակում մեր պաշտպանության բանակը կարողացավ ինքնակազմակերպվել, կանգնեցնել թշնամու առաջխաղացումը, որից հետո կնքվեց հերթական հրադադարը, ինչը տեղի չունեցավ 2020 թվականին։ Մարդիկ պատասխանատվությունից խուսափեցին, իբր թե իրենց դավաճան կասեին, եթե դադարեցնեին պատերազմը։ Այսօրվա իշխանությունը շահարկելով քառօյա պատերազմը, հայտարարելով, թե բարձունք են հանձնել, թուրք-ադրբեջանական տանդեմին մի ամբողջ Արցախ է հանձնել։
Այս թյուրիմացությունները փորձում են իրենց մեղքի բաժինը բարդել այն մարդկանց վրա, ովքեր Հայաստանում չեն և չեն կարող իրենց պատասխանել։ Համոզված եմ, որ մեր ռազմագերիները, եթե լինեին Հայաստանում, ապա նրանք չէին կարող ասել, թե իշխանազավթում է եղել, քանի որ իշխանությունից ով հրաժարվել է՝ որևէ պարտադրանքի ներքո չի հրաժարվել և նրա բոլոր քայլերը համաձայնեցված են եղել Նիկոլ Փաշինյանի հետ»,-ասաց Դավիթ Գալստյանը։
