ՔՊ-ն իրականում եղել է ՀՅԴ, ուղղակի չենք անդամագրվել, որովհետև մտածել ենք՝ մենք ավելի լավ դաշնակցական ենք, քան իսկական դաշնակցականը. Փաշինյան (Տեսանյութ)

Ժամանական է՝ այսօր ասեմ հրապարակային մի բան, որը մինչև վերջերս ասել եմ ոչ հրապարակային՝ խոսելով գաղափարական տրանսֆորմացիայի մասին. Ֆրանսիայի հայ համայնքի ներկայացուցիչների հետ հանդիպմանը հայտարարել է ՀՀ վարչապետ Նիկոլ Փաշինյանը։

Վարչապետը հայտարարել է՝ եկել է այն եզրահանգման, որ Հայաստանի 3-րդ Հանրապետության հիմնադրման առաջին օրից չեն նկատել, որ ՀՀ-ում կա ընդամենը մեկ կուսակցություն, որը ՀՅԴ-ն է։

Փաշինյանը նշել է, որ ֆորմալ եղել են այլ կուսակցություններ ևս, բայց իրականում մեկ կուսակցության գաղափարախոսություն է եղել, այն տարբերությամբ, որ եղել է իսկական ՀՅԴ և ՀՅԴ, ՀՀՇ, ՀՅԴ, եղել է ժողովրդական ԱԺՄ-ՀՅԴ, եղել է ՔՊ կուսակցություն և ՀՅԴ։

«Այսինքն՝ ՀՀ-ում, ըստ էության, գործող բոլոր կուսակցությունները գործել են ՀՅԴ-ի գաղափարախոսության ներքո։ Իսկ ինչու չեն անդամագրվել ՀՅԴ-ին, որովհետև ՀՀՇ-ին թվացել է, թե ինքն ավելի լավ դաշնակցական է, քան իսկական դաշնակցականը, ՔՊ-ականերին թվացել է, թե մենք ավելի լավ դաշնակցական ենք, քան իրական դաշնակցականը։ Մենք իրականում եղել ենք ՔՊ ՀՅԴ, ընդ որում մենք ունիկալ չենք»,-ասաց նա։

Փաշինյանը հայտարարեց, որ ՔՊ-ի գաղափարական տրանսֆորմացիան առաջին հերթին «Իրական Հայաստանի» գաղափարախոսությունն է. «Պետք է աշխատենք, որ դա ամբողջ հայության գաղափարական տրանսֆորմացիան դառնա»։

«Հիմա նախ ինքներս մեզ ենք ասում՝ ոչ, հետո աղետների միջով անցնելու միջոցով ենք ասում՝ ոչ, ՀՀ-ն ազգային բարձրագույն նպատակն է, ավելի բարձր ազգային նպատակ չկա։ ՀՀ-ն ոչ թե հենման կետ է ինչ-որ ավելի մեծ ու լավ հայրենիք ունենալու համար, այլ այն է, որ մենք ունենք և այն չպետք է օգտագործենք ուրիշ հայրենիքի համար»,-ասաց նա։