«Իրանն իր հիմնական հանձնառությունն է համարում տարածարջանում հարատև խաղաղության և կայունության հաստատումը»,- ասուլիսում ասաց ՀՀ-ում Իրանի դեսպան Մեհդի Սոբհանին։
Նա ընդգծեց, որ Իրանը կտրականապես դեմ է միջազգային սահմանների փոփոխությանը, աշխարհաքաղաքական փոփոխություններին, ուժի կիրառմանը տարածաշրջանային խնդիրների լուծման համար, վճռականորեն աջակցում է երկրների, հատկապես Հայաստանի տարածքային ամբողջականությանը։
«Կեղծ նարատիվների, սպառնալիքների, կասկածների, տեսանյութերի ստեղծումը չի կարող խաթարել երկու երկրների միջև առկա ամուր հարաբերությունները կամ պառակտում և կասկածներ նետել մեր միջև»,- ասաց Մեհդի Սոբհանին։
Ըստ դեսպանի, երկու երկրների հարաբեությունների ապագան շատ պարզ է, ոչ ոք չի կարող դա շեղել։
Դեսպանը հիշեցրեց, որ այս տարի լրանում է Իրանի և Հայաստանի միջև դիվանագիտական հարաբերությունների հաստատման 33-րդ ամյակը։
«Երկու երկրների միջև հարաբերությունները ձևավորվել են փոխադարձ հարգանքի ու վստահության, խաղաղ գոյակցության, միմյանց հանդեպ հույսի շողի և աջակցության հիման վրա։ Իրանը Հայաստանին ու հայ ժողովրդին համարում է իր բարեկամը, Իրանը վերջին տասնամյակների ընթացքում մշատապես աջակցել է Հայաստանի աճին ու հզորացմանը, երկու երկրների հարաբերություններն աստիճանաբար հասել են հասունության և խորության անհրաժեշտ մակարդակի, երկու երկրների հարաբերություններում առկա է փոխադարձ ըմբռնում, իսկ փոխհարաբերությունների տնկին վերածվել է հաստաբուն ծառի»։
