Հայաստանի Հանրապետությունը հայտարարում է Եվրոպական միությանը Հայաստանի Հանրապետության անդամակցելու գործընթացի մեկնարկը:
Կառավարության այսօրվա նիստում ՀՀ արտաքին գործերի նախարար Արարատ Միրզոյանը հայտարարեց, որ քաղաքացիական նախաձեռնության կարգով Ազգային ժողովի քննարկմանն է ներկայացվել օրենքի նախագիծ՝ ԵՄ-ին Հայաստանի անդամակցության գործընթացի մեկնարկի մասին։
ԱԳՆ-ն առաջարկում է դրական դիրքորոշում արտահայտել՝ ելնելով մի շարք հանգամանքներից։
«Նախ՝ վերջին տարիներին Հայաստանն ու ԵՄ-ն բավականին ինտենսիվ ու դինամիկ հարաբերություններ են ունեցել, դրանք ունեցել են շատ հարուստ բովանդակություն ու ընդգրկել են տաբեր ոլորտներ։ ԵՄ-ն տարբեր առիթներով ընդգծված քաղաքական աջակցություն է հայտնել Հայաստանի ժողովրդավարությանը, ԵՄ-ն պատրաստակամություն է հայտնել ու, ըստ էության, ներգրավվել է Հայաստանի շուրջ անվտանգային միջավայրի ապահովմանը, նկատի ունեմ դիտորդական առաքելության տեղակայումը, ԵՄ-ն նաև պատրաստակամություն է հայտնել աջակցել Հայաստանի տնտեսական դիմակայունության ամրապնդմանը»,- ասաց ԱԳ նախարարը։
Միրզոյանի խոսքով՝ ինչպես Նիկոլ Փաշինյանն է հայտարարել՝ Հայաստանը պատրաստ է մոտ լինել ԵՄ-ին այնքան, որքան ԵՄ-ն դա հնարավոր կհամարի։
«Մենք հնարավոր համարելու նշանները տեսել ենք»,- ասաց Միրզոյանը։
Վարչապետ Նիկոլ Փաշինյանն էլ հայտարարեց, թե կարևոր է, որ ճիշտ ըմբռնեն հարցի էությունն ու համատեքստը։
«Կառավարությունը չի առարկում այս օրենքի ընդունմանը, բայց ուզում եմ արձանագրենք, թե ինչ է սա նշանակում։ Սա չի նշանակում Հայաստանի անդամակցություն ԵՄ-ին բառիս ուղիղ իմաստով, որովհետև այդ կետում որոշում կայացնելը չի կարող լինել օրենքի ու կառավարության որոշման մակարդակով, դա կարող է լինել միայն ու միայն հանրաքվեի ճանապարհով, ուրիշ տարբերակ չկա»,- ասաց նա։
Փաշինյանի խոսքով՝ սցենարներից որևէ պարագայում Հայաստանը ԵՄ անդամ կարող է դառնալ միայն այն դեպքում, երբ կնշանակվի հանրաքվե ու ՀՀ սահմանադրությամբ նախատեսված կարգով հանրաքվեի մասնակցիների սահմանված չափով «կողմ» ձայներ կստացվեն։
«Բայց նաև պետք է արձանագրել, որ այս օրենքի ընդունման պարագայում մենք պետք է գործողությունների որոշակի պատկերացում ունենանք՝ մինչև պոտենցիալ հանրաքվե անել-չանելու կետը։ Իմ պատկերացումն այն է, որ այս օրենքի ընդունումից հետո մենք ԵՄ-ի հետ պետք է քննարկենք ճանապարհային այն քարտեզը, որոնք իրենք են պատկերացնում ու որը մենք ենք պատկերացնում, մենք պետք է իրար հետ ճանապարհային քարտեզ մշակենք»,- ընդգծեց նա։
