Նոյեմբերի 25-29-ը Հաագայում տեղի է ունեցել Քիմիական զենքի արգելման կազմակերպության (ՔԶԱԿ) մասնակից պետությունների համաժողովի 29-րդ նստաշրջանը, որի աշխատանքներին մասնակցում էր Հայաստանի Հանրապետության պատվիրակությունը՝ ՀՀ արտաքին գործերի նախարարության միջազգային անվտանգության վարչության պետ Գեորգի Քոչարյանի գլխավորությամբ: Այս մասին հայտնում են ՀՀ ԱԳՆ-ից։
Գեորգի Քոչարյանը հանդես է եկել ազգային ելույթով, որում վերահաստատել է Հայաստանի վճռական հանձնառությունն ամբողջությամբ բացառելու քիմիական զենքի կամ հարակից վտանգավոր նյութերի կիրառման հնարավորությունը և ընդգծել, որ անդամակցությունից ի վեր Հայաստանը անշեղորեն իրականացնում է Քիմիական զենքի կոնվենցիայի դրույթները:
Ազգային ելույթում ընդգծվել է, որ Քիմիական զենքի կոնվենցիայի կիրարկման շրջանակներում առաջացող տարաձայնությունները պետք է հաղթահարվեն երկխոսության և համագործակցության միջոցով:
Համաժողովի ընթացքում քննարկվել է Կոնվենցիայի իրականացման ընթացքը, առկա մարտահրավերները և առաջիկա քայլերը։
ՀՀ պատվիրակությունն ունեցել է նաև մի շարք երկկողմ հանդիպումներ, որոնց ընթացքում քննարկվել են փոխադարձ հետաքրքրություն ներկայացնող հարցեր:
