Լրագրողների հետ ճեպազրույցում նախկին զինդատախազ Գագիկ Ջհանգիրյանը պատասխանելով հարցին, թե ինչպե՞ս է պատկերացնում աշխատանքը Փաշինյանի հետ, քանի որ ինքը ժամանակին Նիկոլ Փաշինյանի ներկայացրած նախագիծն անգրագիտություն էր որակել, նա էլ ասել էր՝ ով իմ նախագիծն անգրագիտություն է ասում, անգրագետն ինքն է, ասաց. «Ձեր այդպիսի գայթակղություններին չեմ տրվի, այդ անցած-գնացած... ես էլ հարյուրավոր լավ էպիզոդներ կարող եմ վկայակոչել իմ ու Փաշինյանի համատեղ քաղաքական գործունեության որպես կալանավոր, բանտարկյալ գործունեության, բայց դրա ժամանակը չէ»: Լրագրողները հիշեցրեցին, որ Նիկոլ Փաշինյանը հայտարարել էր, թե Գ. Ջհանգիրյանը երազում է գլխավոր դատախազ դառնալ, նախկին զինդատախազն արձագանքեց. «Նիկոլ Փաշինյանն է ասե՞լ, չգիտեմ։ Գիտեմ, որ Նիկոլ Փաշինյանը դեռևս անազատության մեջ մի հոդված է գրել, որտեղ ինքը հայտարարում էր՝ ինքը գտել է Հանրապետության գլխավոր դատախազի թեկնածուին՝ հանձինս Գագիկ Ջհանգիրյանի։ Ես տվել եմ համաձայնությունը ԲԴԽ իրավաբան-անդամ առաջադվելուն: Հիշեցնենք, որ այսօր՝ Ազգային ժողովում, «Իմ քայլը» խմբակցությունը հանդիպել է նախկին զինդատախազ, «Մարտի 1»-ի գործով դատապարտված, իսկ 10 տարի անց արդարացված Գագիկ Ջհանգիրյանի հետ։ Հանդիպման ընթացքում քննարկվել է Բարձրագույն դատական խորհրդի անդամի պաշտոնում նրա թեկնածության հարցը: |