Եվրամիությունը մտադիր է սոցցանցերին եւ մեսենջերներին պարտավորեցնել ահաբեկչության դեմ պայքարի նպատակով բացահայտել հաղորդագրությունների կոդավորումը, հաղորդում է Bloomberg-ը:
Այս մասին ասվում է ԵՄ ներքին գործերի նախարարների հանդիպման նախաշեմին արված հայտարարության մեջ:
Գործակալությունը նշում է, որ Ֆրանսիայում եւ Ավստրիայում վերջին հարձակումներն ահաբեկչությանը վերադարձրել են Եվրամիության քաղաքական օրակարգի առաջին տեղ: «Մենք պետք է եվրոպացիներին պաշտպանենք իսլամիզմից: Թվային տվյալների նկատմամբ հասանելիությունն առավել կարեւոր է դառնում»,-ասվում է հայտարարության մեջ:
Միեւնույն ժամանակ, նշվում է, որ «սոցցանցերն ու այլ պրովայդերները պատասխանատվություն են կրում, որպեսզի իրենց ծառայությունները չօգտագործվեն անօրինական գործունեության կամ ահաբեկչության, հանցավորության կամ ատելության քարոզչության համար»:
Միեւնույն ժամանակ, գործակալությունը նշում է, որ ԵՄ առաջարկը կապված է ահաբեկչական քարոզչությունը կանխելու հետ:
