Ես անմիտ ճնճղուկ եմ. համացանցում հայտնի դարձած աշակերտը անկեղծացել է.(տեսանյութ ,լուսանկարներ)

Հեղափոխություն չի եղել, դա պարզապես իշխանափոխություն էր:Նույն իշխանության մնացորդներն են: Այս մասին Armday.am-ի հետ զրույցում ասաց  համացանցում տեսանյութից հայտնի դարձած  Աշոտ Դալլաքյանը, ով պաշտպանում էր Վանաձորում 20 -րդ դպրոցի աշակերտների շահերը: Armday.am-ը քաղաքական,հասարակական և այլ հարցերի շուրջ  զրուցել է Աշոտ Դալլաքյանի հետ.հարցազրույցն ամբողջությամբ ներկայացնում ենք ստորև.

-Աշոտ, քանի՞ տարեկան եք, կպատմե՞ք Ձեր մասին:

-17 տարեկան եմ: Ստեղծագործում եմ 12 տարեկանից: Նաև երգում եմ, ինձ ճանաչում են, որպես աշուղ ԱՇՐԱՖ:

-Որտե՛ղ եք սովորել:

-Սովորել եմ  Անդրանիկ Մարգարյանի անվա քաղաքագիտական դպրոցում:

-Իսկ ստեղծագործելու շնորհը որտեղի՞ց է գալիս: Ընտանիքում ստեղծագործողներ, երգողներ կա՞ն:

-Ստեղծագործելս բնատուր շնորհ է, որի համար շնորհակալ եմ Աստծուն: Ընտանիքիս անդամների մեջ երգող, ստեղծագործող մարդիկ չկան:

-Հետաքրքրվա՞ծ եք մեր երկրի քաղաքական անցուդարձով:

-Այո, հետաքրքրված եմ մեր երկրի և՛ ներքին, և՛ արտաքին  վիճակով: Ոչ միայն հետաքրքրված եմ, այլև մտահոգված:

-Ի՞նչ կասեք հեղափոխության մասին, ի՞նչ հույսեր ունեք:

-Հայաստանում  հեղափոխություն չի եղել, իշխանափոխություն է տեղի ունեցել  պարզապես:Հեղափոխության գաղափարն այլ բան է, դա ոչ-ոք  չի հասկանում:

 -Ո՞րն է, ըստ  Ձեզ, հեղափոխության գաղափարը:

-Հեղափոխության առաջին գաղափարը ժողովրդի միավորումն է: Եթե 34 տոկոսը  փողոցներում ցույց է կազմակերպում և կատարվում է թավշյա, բմբլա, բրդյա հեղափոխություն, ես դեմ եմ նման հեղափոխությանը: Ժողովրդի ձայնին ոչ-ոք ուշադրություն չի դարձնում: Նույն իշխանության  մնացորդներն են:

-Ձեզ քաղաքականության մեջ տեսնո՞ւմ եք:

-Քաղաքականությունն ինձ համար հոբբի է: Հետևում եմ, տեղեկացված եմ իրադարձություններից, բայց այլ նպատակներ  չունեմ: Կուսակցական պատկանելություն չունեմ, մարդ եմ, ով վեր է դասում մարդկային արժեքները և հետո կուսակցական և մնացած  հարաբերությունները:

-Ի՞նչ թերություններ եք նկատել Վանաձորի  կառավարման համակարգում:

-Ինձ դուր չի գալիս Լոռու մարզի մարզպետի և աշխատակիցների գործունեությունը: Դրա ապացույցը 20-րդ դպրոցում տեղի ունեցածն է,  երբ երեք ձայնը հաղթում է չորս ձայնին:

-Շարունակելու՞ եք Ձեր պայքարը:

 -Այո, շարունակելու եմ բողոքել: Ես մարզպետին և մյուսներին ասել եմ, որ  այս քաղաքում ոչ մի անօրինականություն չի կարող տեղի ունենալ:Թող գնան, որտեղ ուզում են, անօրինականությամբ զբաղվեն: Ասպարեզ չբարձրանան բարու կերպարով ու հակառակն անեն:

-Նիկոլ Փաշինյանի կառավարումից գո՞հ եք:

-Աստված Նիկոլ Փաշինյանի հետ: Եթե մարդը ինչ-որ գործ  սկսել է,  թող կիսատ չմնա, բայց նրան թույլ չեն տալիս աշխատել: Բոլորն անգրագիտության վերջին էտալոնն են, իրենց գործից չեն հասկանում: Քոմմենթներով երկիր չեն կառավարում: Ուղիղ եթերները  վատ միտք չէր: Ամեն օր ժողովրդին հաշվետվություն  է տրվում: 

-Որոշե՞լ եք ով եք դառալու ապագայում:

-Կուզենամ այնպիսի մարդ դառնալ,որ հարիր ձևով ծառայեմ իմ ժողովրդին: Իմ ողջ կյանքում ծառայել եմ հասարակությանը,այդ մասին Վանաձորում բոլորը գիտեն:

-Քաղաքական գործիչ կդառնա՞ք:

 -Ես ինձ չեմ տեսնում քաղաքանության մեջ, դա շատ ծանր գործ է: 

-Կուզենայի՞ք վարչապետ լինել և եթե այս պահին վարչապետ լինեիք, ի՞նչ կանեիք:

-Մեկ անգամ պատկերացրել եմ ինձ վարչապետի պաշտոնում: Եթե վարչապետ լինեի, ապա առաջին բանը այն կլիներ, որ երբեք եվրոպական ոճով  չէի մտածի: ԼԳՏՊ և այլն և այլն: Եթե Երկրի  քաղաքական  բարձրագույն ամբիոնից  ելույթ է ունենում տրանսգենդեր, ապա էլ ի՞նչ պատկերացնեմ հետագայի մասին:

-Դե՞մ եք տրանսգենդերներին:

-Ոչ միայն դեմ  եմ, չեմ էլ ուզում խոսել նրանց մասին: Եթե ուզում են եվրոպա մտնել, թող գնան Եվրոպա,  առաջին անգամ  տեսա կյանքումս, որ երկրի քաղաքական բարձրագույն ամբիոնից տրանսգենդեր է ելույթ ունենում: Ես մեծ ցավ եմ ապրում: Դա քարոզ էր: Տեսեք, նույնիսկ նյարդայնացա այս մասին խոսելիս:

-Սիրո՞ւմ եք ուշադրության կենտրոնում լինել:

-Այդքան էլ չեմ սիրում ուշադրության կենտրոնում հայտնվել:

-Քննադատություններին ինչպես եք վերաբերվում: Երեկ համացանցում Ձեր հասցեին նաև քննադատություններ եղան:

-Քննադատությւններին հանդուրժողականություն եմ ցուցաբերում:

-Ի՞նչ համոզմունքներ ունեք:

-Ես ունեմ գիտակցություն: Կյանքում երբեք անհնար է, որ անմիտ ճնճղուկը բազեի ճանկից ինչ-որ որս  խլի, բայց  այս պարագայում, ես Լոռու մարզետին ասել եմ, որ անմիտ ճնճղուկը ես եմ, ես ինձ համարում եմ անմիտ ճնճղուկ և  վատ չեմ զգում դրանից և  փորձելու եմ բազեի ճանկից որս խլել: Այդ որսը արդարությունն է, որը պահանջում են 20-րդ դպրոցի  աշակերտները: Ես շատ անօրինականություններ եմ բացահայտել, ադ մասին ավելի ուշ կխոսեմ :

-Ձեզ աջակցող մարդիկ շա՞տ են: Գնահատո՞ւմ են Ձեր աշխատանքը:

-Այսօր բազմաթիվ  պաշտոնյաների հետ եմ հանդիպել: Ոմանց հետ ես  եմ հանիպում խնդրել, ոմանք՝ իրենք են կանչել: Կան պաշտոնյաներ, որ ասում են թիկունքիս կանգնած են և ես այն  ինչ անում եմ, ճիշտ եմ անում:

-Սիրո՞ւմ եք տարբերվել:

-Չեմ սիրում տարբերվել, բայց ինձ շատ հաճախ են ասում , որ տարբերվում եմ: Աստծուն շնորհակալ եմ նրա համար, ինչպիսին կամ՝ իմ բնատուր շնորհով: Այն ես ոչ  միայն օգտագործում եմ ինձ համար, այլ պետականամետ շահի համար:

-Հիմնականում կոստյում եք հագնում, հատո՞ւկ եք այդպես հագնվում, ինչ -որ բան խորհրդանշո՞ւմ է:

-Կոստյումով լինելը պայմանավորված  չէ որևէ բանով: Առաջին դասարանից դպրոց եմ հաճախում միշտ կոստյումով:  Սիրում եմ կոստյումով լինել պարզապես:

Կարինե Գևորգյան