Այժմյան Թուրքիայի տարածքում գտնվող Դիարբեքիր նահանգի Քայափընար շրջանում հայտնաբերվել է 1200 տարվա 37 էջից բաղկացած Նոր Կտակարան, գտածոն առգրավվել է մի խումբ գանձագողերի ձեռքից:
Ինչպես գրում է թուրքական «Ջումհուրիյեթ» պարբերականը, գործի առնչությամբ ձերբակալվել է 3 կասկածյալ, որոնք ենթադրաբար ցանկացել են վաճառել Աստվածաշունչը՝ որպես հնագույն հազվագյուտ իր:
Դիարբեքիրի հանրապետական դատախազության հրամանով կասկածյալների հանդեպ հետապնդում է իրականացվել, որի ընթացքում նրանց ձերբակալել են հենց դեպքի վայրում՝ անօրինական պեղումներ իրականացնելիս:
Գտածոն տարվել է հատուկ ուսումնասիրության: Արդեն հայտնի է, որ այն ունի առնվազն 1200 տարվա պատմություն: Աղբյուրը չի մանրամասնում, թե ինչ լեզվով է շարադրված Նոր Կտակարանը:
Հիշեցնենք, որ օրերս Դիարբեքիր նահանգի Սիլվան շրջանում գանձագողության մեղադրանքով 8 մարդ է ձերբակալվել, նրանցից 4-ը բարձրաստիճան ոստիկաններ էին: Հարցաքննության ընթացքում պարզ էր դարձել, որ ոստիկանները Սիլվանում պեղումներ են սկսել իրականացնել հայկական գանձեր գտնելու նպատակով:
![[Haber görseli]](http://www.cumhuriyet.com.tr/Archive/2019/2/5/1231590_resource/iNCiL4.jpg)
![[Haber görseli]](http://www.cumhuriyet.com.tr/Archive/2019/2/5/1231590_resource/iNCiL1.jpg)
