Վերջին օրերին սոցիալական ցանցերում տարբեր օգտատերերի կողմից գրառումներ են արվում այն մասին, որ Ճանապարհային ոստիկանությունը պատշաճ չի կատարում իր լիազորությունները։ Համաձայն որոշ գրառումների պատճառն այն է, որ ՃՈ-ին տրամադրվող դիզվառելիքի չափաբաժինը նվազել է, ինչն էլ ըստ էության պատճառ է դարձել, որ ՃՈ-ը չի արձագանքում իրավախախտումներին։
Արդյո՞ք ՃՈ-ին տրամադրվող բենզինի չափը նվազել է, Irakanum.am-ը հետաքրքրվեց ՀՀ Ոստիկանության լրատվական ծառայությունից։ Ոստիկանության հասարակայնության հետ կապի և լրատվության վարչության պետի տեղակալ Էդգար Ջանոյանը, սակայն, մեզ հետ զրույցում վստահեցրեց, որ ՃՈ-ին ծառայություն իրականացնելու համար տրամադրվող բենզինի չափաբաժինը փոփոխության չի ենթարկվել։ «Սահմանված կարգով, ինչպես նախկինում է եղել, Ճանապարհային ոստիկանները ստանում են նույն վառելիքը, հետեւաբար այդ պնդումները իրականության հետ որեւէ աղերս չունեն»,- ասաց Ջանոյանը, հավելելով, որ Ճանապարհային ոստիկանները նույն ծավալով շարունակում են ծառայություն իրականացնել հանրապետության ամբողջ տարածքում:
Ջանոյանը նաեւ ասաց, որ Ոստիկանության պետի կողմից եղել է հանձնարարական, տոնական օրերին իրականացնել ուժեղացված ծառայություն։
