Ապրիլի 3-ին YouTube ինտերնետ-ծառայության՝ ամերիկյան Սան Բրունո քաղաքում գտնվող շտաբ-բնակարանում կրակահերթ բացած ու հետո ինքնասպան եղած 39-ամյա Նասիմ Աղդամն իրանուհի էր և այս արարքով փորձել է վրեժ լուծել իր տեսանյութերը գրաքննող ծառայությունից:
Այս մասին գրում է The Daily Mail-ը՝ հավելելով, որ YouTube-ում պարբերաբար նոր տեսանյութեր հրապարակող ու ավելի քան 5.000 բաժանորդ ունեցող իրանուհուն դուր չէին գալիս ծառայության «բռնատիրական» կանոնները: Նա նաև մեղադրում էր YouTube-ին իր տեսանյութերն ակտիվ գրաքննելու համար:
Հայտնի է, որ Կալիֆորնիայի բնակչուհին, մուտք գործելով շտաբ-բնակարան, ատրճանակով կրակ է բացել 3 հոգու վրա՝ նրանց հասցնելով ոչ մահացու վնասվածքներ: Հայտնի է, որ վիրավորներից մեկը նրա ընկերն է եղել:
Աղդամի հայրը՝ Իսմայիլ Աղդամը, պատմել է, որ վերջին շրջանում դուստրն անընդհատ բողոքում էր, որ YouTube-ն իրեն այլևս չի վճարում գովազդի համար:Անհանգստացած հայրն այդ մասին տեղեկացրել էր ոստիկանությանը՝ չբացառելով, որ դուստրը կարող է ինչ-որ ձև արտահայտել իր ատելությունը:
Նշվում է, որ հարձակումից 2 օր առաջ Աղդամն անհետացել էր ու կապ չէր հաստատում ընտանիքի հետ:
