Հայաստանի իշխանությունները քաղաքացիներին թույլ կտան նվիրատվություններ կատարել լրատվամիջոցներին, ՀԿ-ներին և քաղաքական կուսակցություններին։ Ինչպես հունիսի 25-ին կայացած ճեպազրույցի ժամանակ հայտնել է վարչապետ Նիկոլ Փաշինյանը, ներկայումս պատրաստվում են համապատասխան օրենսդրական կարգավորումները։
Փաշինյանի փոխանցմամբ՝ քաղաքացիները հայտարարագիր լրացնելիս կկարողանան իրենց ընտրությամբ նվիրատվություններ կատարել վերը նշված կատեգորիաների կազմակերպություններին՝ սոցիալական կրեդիտներ ստանալու ժամանակ։
Պատասխանելով բժշկական ապահովագրության հիմնադրամի գործունեության մասին հարցին՝ վարչապետը կես տարվա աշխատանքը գնահատել է լավ՝ չնայած չակերտավոր բարյացկամների կողմից այն վարկաբեկելու բոլոր փորձերին։ Նախորդ օրը կայացել է մրցութային հանձնաժողովի նիստը, ձևավորվել է հոգաբարձուների խորհուրդը և ընտրվել է գլխավոր տնօրենը։ Իշխանությունների վարած քաղաքականության համաձայն՝ մինչև 2028 թվականը ծրագրում ներգրավված կլինի ողջ բնակչությունը։ Հաջորդ փուլում ծրագիրը կներառի 63 տարեկան և բարձր տարիքի անձանց։
Փաշինյանը նաև վերահաստատել է նախկինում ասվածն այն մասին, որ նոր կաբինետում մեծ փոփոխություններ չեն նախատեսվում, համենայն դեպս՝ դրանք չեն լինի փոխվարչապետների մակարդակով։
Լրատվամիջոցների խնդրանքով վարչապետն անդրադարձել է նաև այն ջրասուզակի պարգևատրման հարցին, ով օրեր շարունակ անձնուրաց կերպով փնտրում էր Լոռիում զոհված երեխաների մարմինները։ Նրա խոսքով՝ հարցը կդիտարկվի ՆԳՆ ղեկավարի զեկույցից հետո։
