Իշխանությունն ամեն գնով պահպանելը դեռ չի վկայում հասարակության վստահության մասին, ընտրություններից հետո տեղի ունեցող զարգացումներին անդրադառնալով՝ գրել է ՀՀԿ ԵԿ նախագահ Հենրիխ Դանիելյանը։
Նա, մասնավորապես, նշել է.
«Իշխանությունը փորձում է ընտրությունների արդյունքները ներկայացնել որպես իր քաղաքական գծի լիարժեք հաստատում։
Սակայն թվերն ու քաղաքական իրողությունները խոսում են այլ բանի մասին։
Պետական ամբողջ ռեսուրսի, տեղեկատվական գերակայության, ընդդիմախոսների նկատմամբ ճնշումների և քաղաքական հետապնդումների պայմաններում իշխանությունը չկարողացավ ապահովել ոչ սահմանադրական մեծամասնություն, ոչ էլ ստանալ ընտրողների բացարձակ մեծամասնության վստահությունը։
Սա պարզապես ընտրական արդյունք չէ․ սա քաղաքական գնահատական է։
Հատկանշական է նաև, որ վերջին տարիներին գործող իշխանությունը կորցրել է իր դիրքերը Երևանի և Գյումրու նման առանցքային քաղաքներում, ինչը վկայում է հանրային տրամադրությունների էական փոփոխության մասին։
Ուստի այս արդյունքը դժվար է չդիտարկել որպես ռազմավարական անհաջողություն։
Ավելի ճիշտ կլինի այն բնութագրել որպես պյուրոսյան հաղթանակ՝ ձևական հաջողություն, որը ձեռք է բերվել քաղաքական վստահության շարունակական նվազման պայմաններում։
Ի վերջո, քաղաքականության մեջ իշխանության պահպանման փաստն ինքնին դեռևս չի նշանակում հասարակական վստահության պահպանում։
Իսկ հասարակության զգալի հատվածի անվստահությունը վաղ, թե ուշ վերածվում է նոր քաղաքական գործընթացների և նոր քաղաքական իրողությունների»։
