Ադրբեջանի տարածքով Հայաստան, բացի հացահատիկի մատակարարումից, Ռուսաստանը քննարկում է պարարտանյութ մատակարարելու հնարավորությունը, ասել է Ռուսաստանի փոխվարչապետ Ալեքսեյ Օվերչուկը։
«Տեղի է ունեցել կարևոր իրադարձություն, և մենք այն համարում ենք իսկապես նշանակալից. ռուսական հացահատիկ տեղափոխող առաջին գնացքը անցել է Ադրբեջանի և Վրաստանի տարածքով դեպի Հայաստան։ Սա առաջին դեպքն է ավելի քան 30 տարվա ընթացքում, և առաջին անգամն է, որ Հայաստանի և Ադրբեջանի անկախացումից ի վեր անցել է հացահատիկ տեղափոխող գնացք։
Այնուհետև անցել է ղազախական հացահատիկը։ Մենք նաև քննարկում ենք այլ տեսակի բեռներ, ինչպիսիք են պարարտանյութերը, տեղափոխելու հնարավորությունը», - ասել է Օվերչուկը։
Նա նաև նշել է, որ վերջերս Ադրբեջանից Հայաստան է ժամանել նավթամթերք տեղափոխող գնացք։ Մոսկվան և Երևանը քննարկում են նաև հակառակ ուղղությամբ բեռներ ուղարկելու հնարավորությունը։
«Մենք նաև քննարկում ենք Հայաստանից Ռուսաստան Ադրբեջանի միջով բեռներ տեղափոխելու հարցը։ Սրանք բոլորն էլ զարգացումներ են, որոնք վերջերս անհավանական էին թվում», - նշել է նա։
