Armlur.am-ը գրում է. «Այսօր հայրենի խորհրդարանը վերադառնում է արձակուրդից: Մեկնարկելու են Ազգային ժողովի ութերորդ գումարման տասներորդ նստաշրջանի աշնանային նիստերը, որոնք, ըստ մեր տեղեկությունների, բավականին հագեցած են լինելու:
ArmLur.am-ը տեղեկացավ, որ բացի նրանից, որ հայրենի իշխանությունները կառավարության կողմից ուղարկված անթիվ անհամար նախագծերն են քննարկելու, ընդունելու, նաև մի քանի գերատեսչությունների 2024 թվականի գործունեության վերաբերյալ հաղորդումն են օրակարգակում ներկայացնելու:
Չնայած նրան, որ արդեն 2025 թվականն է մոտենում, բայց խորհրդարանականներին ներկայացվել է 2024 թվականի գործունեության հաղորդումը:
Նախ պետք է կայանա Հայաստանի Հանրապետության հանրային ծառայությունները կարգավորող հանձնաժողովի անդամի ընտրությունը․ դրա համար ընդդիմադիր խմբակցություններն առաջադրել են ՀՅԴ-ական նախկին պատգամավոր Արա Նռանյանի թեկնածությունը:
Այնուհետև կընտրեն Վճռաբեկ դատարանի քրեական պալատի դատավորի թեկնածուներին:
Տարեկան հաղորդում կներկայացվի Հայաստանի Հանրապետության կենտրոնական բանկի գործունեության վերաբերյալ:
Այնուհետև կկայանա Կոռուպցիայի կանխարգելման հանձնաժողովի 2024 թվականի գործունեության վերաբերյալ հաղորդումը, ինչպես նաև Հայաստանի Հանրապետության հաշվեքննիչ պալատի 2024 թվականի գործունեության վերաբերյալ տարեկան հաղորդումը:
Արդեն օրակարգի վերջում կներկայացվի Հայաստանի Հանրապետության պետական եկամուտների կոմիտեի 2024 թվականի գործունեության մասին հաղորդում:
Կարճ ասած՝ թեժ օրակարգով խորհրդարանական աշխատանքները սկսվել են»։
