Օգոստոսի 18‑ին Tashir Arena-ում (Երևանի կրկեսի նորացված շենքում) կայացավ առաջին միջոցառումը. բարեգործական համերգ՝ «Երեխաները՝ երեխաների համար» խորագրով։ Համերգը տեղի ունեցավ կրկեսի ոչ պաշտոնական բացման շրջանակում՝ որպես հատուկ միջոցառում, որը հնարավոր դարձավ «Տաշիր» բարեգործական հիմնադրամի նախագահ Սամվել Կարապետյանի անձնական նախաձեռնությամբ։
Իր 60‑ամյակը Սամվել Կարապետյանը որոշեց նվիրել երեխաներին՝ ներկայացնելով երիտասարդ արտիստների համար պատրաստված նոր բեմը և տոն կազմակերպեց հատկապես նրանց համար, ովքեր հատկապես ջերմության և հոգածության կարիք ունեն: Նրա խնդրանքով նոր Արենայի դռներն առաջին անգամ մեկ երեկոյով բացվեցին ավելի քան 1200 երիտասարդի համար ամբողջ Հայաստանից՝ Վանաձորից, Շիրակից, Հրազդանից, Արտաշատից, Արարատից, Երևանից և այլ քաղաքներից: Հրավիրվածների թվում էին բազմազավակ ընտանիքների երեխաներ, արցախցի ընտանիքներ, ինչպես նաև Հայրենիքի համար իրենց կյանքը զոհաբերած հերոսների և և ռազմական գործողությունների հետևանքով տուժած զինծառայողների երեխաներ:
Սամվել Կարապետյանը կարճ ուղերձ էր հղել իր դստերը՝ Տաթևիկին, ով կյանքի կոչեց այս նախագիծը. «Ես իսկապես ուզում եմ, որ այս օրը հնարավորինս ուրախ լինի: Որ նոր Արենան առաջին անգամ լցվի երեխաների ծիծաղով: Եվ եթե այսօր գոնե մեկ երեխա իրեն երջանիկ է զգա, նշանակում է, որ այս ամենն իզուր չի»:
Նոր Արենայում երեխաներն առաջին անգամ ելույթ ունեցան երեխաների համար, և սա էր համերգի հիմնական իմաստը: Երիտասարդ արտիստներն ու բեմի փոքրիկ հերոսները տոն պարգևեցին իրենց հասակակիցներին: Սա այն անկեղծ բարությունն է, որը փոխանցվում է սրտից սիրտ՝ առանց խոսքերի ու խոչընդոտների, այնպես, ինչպես միայն երեխաները կարող են անել: Համերգային ծրագիրը ներառում էր երաժշտական և պարային համարներ, կրկեսային արվեստ և այլ ստեղծագործական ներկայացումներ, որոնք իրական տոնի և միասնության մթնոլորտ ստեղծեցին:
Համերգի սկզբում ջերմ ու ոգեշնչող խոսքերով երիտասարդ հանդիսատեսին դիմեց «Տաշիր» ընկերությունների խմբի առաջին փոխնախագահ և նախագծի հեղինակ Տաթևիկ Կարապետյանը: Նա ընդգծեց, որ այս օրը նվիրված է նրանց՝ երեխաներին, որոնց համար և ստեղծվել է այս ամենը: Իր ելույթում Տաթևիկը կոչ արեց երեխաներին համարձակորեն երազել, հավատալ հրաշքներին և երբեք չնահանջել դժվարությունների առջև:
«Երազանքները թևեր են, որոնք օգնում են թռչել: Նայեք այս զարմանահրաշ Արենային: Իմ երազանքն էր, որ Հայաստանում հայտնվի այսօրվա անկեղծ զգացմունքների, ուրախության վայր: Եվ այսօր դա իրականություն դարձավ, որովհետև դուք այստեղ եք: Մի դադարեք երազել և գործել: Սա միակ ճանապարհն է, որով հրաշքները հնարավոր են», – ասաց Տաթևիկը՝ նշելով, որ ուրախությունն ու անկեղծ հույզերը նոր տարածքը լցնում են հատուկ իմաստով:
Ծրագրում հատուկ տեղ զբաղեցրեցին Գևորգ Գինոսյանի և Սոս Պետրոսյանի անվան կրկեսային դպրոցների սաների ելույթները: Այս խմբերը, չնայած դժվարություններին, մնացին երկրում՝ շարունակելով զարգացնել ազգային կրկեսային արվեստը:
«Մեր ուսանողների համար նման միջոցառմանը մասնակցելը պարզապես ներկայացում չէ, այլ երկար տարիների ոգեշնչում: Երբ երեխաները տեսնում են, որ իրենց տաղանդը գնահատվում է, և որ նրանք կարող են կիսել այն երեխաների հետ, իրական սեր է առաջանում իրենց աշխատանքի նկատմամբ: Շատ ուրախալի է, որ մեր երկրում հայտնվել է ժամանակակից և յուրօրինակ հարթակ, որտեղ երեխաների տաղանդները կարող են բացահայտվել և վերածվել մեծ մասնագիտական նվաճումների», – ասաց Պետրոսյանի անվան կրկեսային դպրոցի գեղարվեստական ղեկավար Սոս Պետրոսյանը:
«Նոր բեմի ստեղծումը երիտասարդ արտիստներին ոչ միայն հնարավորություն է տալիս ելույթ ունենալ, այլ նաև սովորել փորձից, աշխատել և զարգանալ համաշխարհային մակարդակի մասնագետների հետ՝ ապագայում ներկայացնելու հայկական կրկեսի նոր սերունդը: Այսօրվա համերգը կարևոր է բոլոր այն երեխաների համար, ովքեր առաջին անգամ կկանգնեն նոր բեմում: Կարծում եմ՝ սա շատ նշանակալից և խորհրդանշական պահ է», – նշեց Գինոսյանի անվան կրկեսային դպրոցի գեղարվեստական ղեկավար Ավետիս Գինոսյանը:
«Շատ խորհրդանշական է, որ հենց երեխաները առաջինը լցրեցին այս տարածքը լույսով, ուրախությամբ և իմաստով, այդ պատճառով էլ այս առաջին հանդիպումը կարևոր նշանակություն ունի: Մեզ համար սա սովորական համերգ չէ, այլ նորացված Արենայի նոր կյանքի սկիզբ: Թող դրա առաջին ձայնը դառնա մանկական ծիծաղը՝ ամենակարևոր ազդանշանը, որ մենք ճիշտ ուղու վրա ենք», – նշեց Տաթևիկ Կարապետյանը:
Օգոստոսի 18-ի համերգը Tashir Arena-ի պաշտոնական բացումը չէ: Ինչպես արդեն հայտարարվել է, Արենայի բացման պաշտոնական արարողությունն ու ծրագրային ներկայացումների մեկնարկը տեղի կունենան այս աշնանը: Ճշգրիտ ամսաթվի և ծրագրի մասին կհայտարարվի լրացուցիչ:
Լրացուցիչ տեղեկատվություն
«Տաշիր»-ը Հայաստանի խոշորագույն բարեգործական հիմնադրամներից է, որը հիմնադրվել է «Տաշիր» ընկերությունների խմբի նախագահ Սամվել Կարապետյանի կողմից: 2001 թվականից ի վեր հիմնադրամը համակարգային բարեգործական ծրագրեր է իրականացնում Հայաստանի, Արցախի, ինչպես նաև հայկական Սփյուռքի համար:
Հիմնադրամի առաքելությունն է խթանել սոցիալական, հոգևոր և տնտեսական զարգացումը, կայուն ներդրում ունենալ Հայաստանում հասարակության զարգացման գործում: Հատուկ ուշադրություն է դարձվում առողջապահության զարգացմանը: Հիմնադրամը հիվանդանոցներ է կառուցում, հագեցնում, ինչպես նաև մարդասիրական ծրագրեր իրականացնում առողջապահության ոլորտում: Կարևոր տեղ են զբաղեցնում կրթական միջավայրի արդիականացումը՝ դպրոցների, մանկապարտեզների և կրթական կենտրոնների կառուցումն ու վերազինումը: Մեծ ուշադրություն է դարձվում մշակութային, հոգևոր և պատմական ժառանգության պահպանմանը, ինչպես նաև Հայաստանում սպորտային և երեխաների համար նախատեսված ենթակառուցվածքների զարգացմանը: Հիմնադրամի առաջնահերթություններից է ռազմական հակամարտություններից և արտակարգ իրավիճակներից տուժածներին ուղղված օգնությունը: Մասնավորապես, հիմնադրամն ակտիվորեն աջակցում է Արցախից բռնի տեղահանվածներին: Բացի այդ՝ հիմնադրամը համակարգված սոցիալական աջակցություն է ցուցաբերում ընտանիքներին, երեխաներին, վետերաններին ու հաշմանդամություն ունեցող անձանց: Իր գործունեության ընթացքում հիմնադրամն իրականացրել է տասնյակ խոշորածավալ նախագծեր, այդ թվում՝ հիվանդանոցների կառուցում, օժանդակություն սահմանամերձ շրջանների բժշկական հաստատություններին, զոհված և վիրավոր զինծառայողների ընտանիքներին, սպորտային ենթակառուցվածքների զարգացում, ինչպես նաև դպրոցների և եկեղեցիների վերականգնում:
Հիմնադրամը չի սահմանափակվում Հայաստանում միայն միանվագ օգնություն տրամադրելով, այլ ձգտում է ձևավորել խնամքի և կայուն զարգացման ենթակառուցվածք՝ կենտրոնանալով երկարաժամկետ նախաձեռնությունների վրա:
«Երեխաները՝ երեխաների համար» բարեգործական համերգի մասնակիցներ
«Նեպոսեդի» թատերական ստուդիա
Ամենահայտնի միջազգային մանկական երաժշտական ստուդիաներից մեկը, որը հիմնադրվել է 1991 թվականին Ելենա Պինջոյանի կողմից, ով մինչ օրս «Նեպոսեդի»-ի մշտական գեղարվեստական ղեկավարն է: Ստուդիան միավորում է տաղանդավոր երեխաների և դեռահասների, զարգացնում է վոկալ, պարի և դերասանական հմտություններ, մասնակցում է խոշոր մշակութային նախագծերի և տոնական միջոցառումների Ռուսաստանում և արտերկրում:
«Նեպոսեդի» թատերական ստուդիայի ուսանողները հաջողությամբ ելույթ են ունենում մեծ բեմերում և պարբերական դառնում են հեղինակավոր երաժշտական և թատերական մրցույթների դափնեկիրներ՝ ելույթներ ունենալով Ճապոնիայում, Իտալիայում, Ուելսում, Նորվեգիայում, Ֆինլանդիայում, Բուլղարիայում, Ռումինիայում, Իսպանիայում, Կիպրոսում և այլ երկրներում:
«Արցախի ձայներ» երաժշտական համույթ
«Արցախի ձայներ»-ը երաժշտական նախագիծ է, որը հիմնադրվել է 2003 թվականին պրոդյուսեր Լիրա Քոչարյանի կողմից՝ միավորելով արցախցի տաղանդավոր երիտասարդ կատարողներին և ներկայացնելով արցախյան մշակույթն ու փոփ երաժշտությունը միջազգային ասպարեզում: Իր գործունեության տարիների ընթացքում խումբը լայն ճանաչում է ձեռք բերել և դարձել է տարածաշրջանի կարևոր մշակութային դեսպանը՝ կատարելով ինչպես կոլեկտիվ, այնպես էլ անհատական համարներ:
Խումբն ակտիվորեն շրջագայում է՝ ներկայացնելով արցախյան մշակույթն ու երաժշտությունը տարբեր երկրներում: «Տաշիր» բարեգործական հիմնադրամը 2012 թվականից բազմիցս աջակցել է երաժշտական խմբին:
«ՏաԼույս» մանկապատանեկան երգչախումբ
Մանկական երաժշտական խումբ, որը գործում է Տավուշի թեմին կից: Խմբի կատարողները երեխաներ ու դեռահասներ են, որոնց միավորում է երաժշտական և հոգևոր աճի ընդհանուր ձգտումը: Խումբը կատարում է ազգային և ժամանակակից ստեղծագործություններ և ակտիվորեն մասնակցում է մշակութային, բարեգործական միջոցառումների՝ հայկական երաժշտական ավանդույթները տարածելով երիտասարդների շրջանում, մասնակցում է տարածաշրջանային և ազգային մշակութային համերգների և փառատոնների: Գեղարվեստական ղեկավարն է Մարիա Գալստյանը:
Սոս Պետրոսյանի անվան կրկեսային դպրոց-ստուդիա
Հայաստանում կրկեսային արվեստի ոլորտի առաջատար ուսումնական հաստատություններից մեկն է: Այն հիմնադրվել է ՀՀ վաստակավոր մշակութային գործիչ, արվեստի պատմության դոկտոր, պրոֆեսոր Սոս Պետրոսյանի կողմից, ով նաև Հայաստանի կրկեսային գործիչների միության նախագահն է: Դպրոց-ստուդիան դարձել է իր հիմնադրի երկարամյա մասնագիտական և մանկավարժական գործունեության շարունակությունը, որը ճանաչվել է ինչպես Հայաստանում, այնպես էլ արտերկրում: Կրթական հաստատությունը կարևոր դեր է խաղում հայկական կրկեսային ավանդույթների պահպանման և զարգացման գործում: Այստեղ, փորձառու ուսուցիչների ղեկավարությամբ, երեխաներն ու դեռահասները սովորում են տիրապետել կրկեսային արվեստի հիմնական ժանրերին՝ ակրոբատիկայից մինչև ծաղրածուություն: Դպրոցը շարունակում է զարգացնել հայկական կրկեսային հմտությունների բարձր մակարդակը՝ հենվելով իր հիմնադրի երկարամյա փորձի ու միջազգային ճանաչման վրա: Դպրոցի գեղարվեստական ղեկավարն է Սոս Պետրոսյանը:
Մայր Աթոռ Սուրբ Էջմիածնի Հայ Առաքելական Եկեղեցուն կից Գևորգ Գինոսյանի անվան կրկեսային դպրոց
Կրթական հաստատություն, որը մասնագիտացած է երեխաներին և դեռահասներին կրկեսային և էստրադային արվեստի հիմունքները՝ ակրոբատիկա, ժոնգլյորություն, ծաղրածուություն, օդային մարմնամարզություն, էստրադային ժանրեր սովորեցնելու գործում: Դպրոցը ստեղծվել է Հայաստանում կրկեսային արվեստի հիմունքները՝ ակրոբատիկա, ժոնգլյորություն, ծաղրածուություն, օդային մարմնամարզություն, էստրադային ժանրեր սովորեցնելու, Հայաստանում կրկեսային արվեստը զարգացնելու, արտիստների նոր սերունդ կրթելու և պահպանելու նպատակով:
