Մեղրիում հոսանքահարված զինծառայող Կարեն Ավետիսյանը Արագածոտնի մարզի Ապարան խոշորացված համայնքի Վարդենուտ բնակավայրից էր: 24News-ի հետ զրույցում համայնքի ղեկավար Կամո Սահակյանը ասաց, որ ընտանիքի միակ որդին էր. «Մի քույր ունի, շատ համեստ, բարի, խելոք, շնորհքով տղա էր: 1 տարի է՝ զորակոչվել էր բանակ»,- ասաց Սահակյանը:
Սահակյանի խոսքով, ընտանիքը սոցիալապես լավ պայմաններում չի ապրում. «Գյուղատնտեսությամբ են զբաղվում, վարուցանք անում»:
Հիշեցնենք՝ քիչ առաջ ՊՆ-ն հաղորդագրություն էր տարածել, որ այսօր՝ ժամը 10։30-ի սահմաններում, դեռևս չպարզված հանգամանքներում հոսանքահարման հետևանքով մահացել է ՀՀ ՊՆ N զորամասի զինծառայող Կարեն Էդգարի Ավետիսյանը։
Դեպքի հանգամանքներն ամբողջովին պարզելու նպատակով ընթանում է քննություն։
Պաշտպանության նախարարությունը վշտակցում և զորակցություն է հայտնում զինծառայողի ընտանիքի անդամներին, հարազատներին և ծառայակիցներին։
