Մեր երազանքի կետը շարունակում է մնալ այն, որ Հայաստանում արդարադատությունը նշանակի արդարություն, բայց պետք է խոստովանեմ, որ չենք հասել այդ կետին, Հայաստանի Հանրապետության կառավարության ծրագրի (2021-2026 թթ.) 2024 թվականի կատարման ընթացքի և արդյունքների մասին զեկույցի քննարկման ժամանակ ԱԺ-ում այս մասին հայտարարեց վարչապետ Նիկոլ Փաշինյանը։
Նա ասաց, թե Հայաստանում այսօր գործող դատավորների կազմը մոտ 60 տոկոսով նշանակվել է հեղափոխությունից հետո։
Վարչապետը հայտարարեց, թե արդարադատությունը միշտ չէ, որ արդարություն է, դրա համաձայն՝ արդարադատությունը երբեմն կարող է նմանվել «Տերովին տերն է տարել, անտերին՝ գելը» հին առածին։
«Անհեթեթորեն ձգվող դատավարութունները սրա ամենավառ օրինակներն են»,- նշեց նա։
Նիկոլ Փաշինյանի խոսքով՝ ամոթ չէ, որ երկրի վարչապետը նման խոստովանություն է անում։
«Իմ ասածը նշանակում է վճռականության վերահաստատում, որ առկա իրավիճակի հետ համակերպվելուց հրաժարվում ենք ու հրաժարվելու ենք, որ անկախ ու արդար դատական համակարգ ունենալու նպատակը պետք է իրագործվի միանշանակ ու աներկբա»,- ընդգծեց նա։
Փաշինյանը հայտարարեց, որ նոր Սահմանադրության ընդունման համատեքստում պետք է լրջորեն քննարկել երդվյալ ատենակալների ինստիտուտի ներդրման հնարավորությունը։
