ՀՀ արտաքին գործերի նախարար Արարատ Միրզոյանը պնդում է, որ Բելառուսում ձերբակալված հայ բլոգերի հարցով, որին Հայաստան վերադարձրեց Գագիկ Ծառուկյանը, իրենք զբաղվել են։
Նա ասաց, թե փետրվարի 20-ին ՀՀ ԱԳՆ-ն պաշտոնական գրությամբ դիմել էր Բելառուսին՝ հայցելով տեղեկատվություն բլոգերի մասին։
«Երեք օր անց ստացել ենք պատասխանը, որն ասում էր՝ այդ անձը 15 օրով ազատազրկված է, ժամկետը լրանալուց հետո բաց է թողնվելու։ Ո՞վ է ջանք գործադրել բաց թողնելու համար, ո՞վ է ներկայացրել որպես իր ձեռքբերում, մեզ չի հետաքրքրում, մենք հավաստիացել ենք, որ մեր քաղաքացին 15 օր հետո բաց է թողնվելու, մնացածը՝ ով ում ուզում է, թող ծաղիկ նվիրի»,- ասաց նա։
Միրզոյանը նշեց, թե Բելառուսի հետ հարաբերությունները վատթարացրել են այն մարդիկ, ովքեր պաշտոնապես, հրապարակավ ընդունել են, որ Բելառուսը օգնություն է ցուցաբերել Ադրբեջանին, այդ թվում՝ ռազմական։
«Ու այդ մարդիկ ամենևին ՀՀ պաշտոնյաները չեն, նրանք Բելառուսի ներկայացուցիչներ են»,- ասաց նա։
