Հենրիխ Դանիելյանը գրում է. «Նկարում Տիանանմենի հրապարակում եմ, որտեղ հարգանքի տուրք ենք մատուցում մեր չինացի բարեկամներին՝ ամրապնդելով հայ-չինական պատմական բարեկամության սյուները: Տիանանմենի այս հրապարակը մեզ հիշեցնում է ՀՀԿ նախագահ, ՀՀ երրորդ նախագահ Սերժ Սարգսյանի այցը, որի ընթացքում նա, Չինաստանի Ժողովրդական Հանրապետության նախագահ Սի Ցզինպինի հետ միասին, կարևոր քայլեր ձեռնարկեց հայ-չինական հարաբերությունների զարգացման և համագործակցության խորացման ուղղությամբ:
Չինաստան կատարած մեր այցի ընթացքում՝ AIBO ակադեմիայի շրջանակներում, մենք հնարավորություն ունեցանք ուսումնասիրելու դիվանագիտության և մշակույթի կարևորագույն մոտեցումներ՝ միաժամանակ ականատես լինելով այն հարգանքին, որը մեր չինացի գործընկերները ցուցաբերում են ՀՀ 3-րդ նախագահի հանդեպ: Նրանք կրկին անգամ ընդգծեցին Սերժ Սարգսյանի հեռատես քաղաքականության արդյունքները, որոնք այսօր էլ անդրադառնում են հայ-չինական ամուր գործընկերությանը:
Այցելելով Չինաստանի խոշորագույն ռազմարդյունաբերական գործարաններից մեկը՝ մեզ տեղեկացրին, որ Սերժ Սարգսյանի նախագահության տարիներին կնքված համագործակցության պայմանագիրը շարունակում է գործել մինչ օրս՝ ապացուցելով նրա դիվանագիտական ռազմավարության երկարաժամկետ արդյունավետությունը:
Ցավոք, այսօրվա իշխանությունները, իրենց անմխիթար անգործությամբ և ապաշնորհ քաղաքականությամբ, խայտառակում են մեզ միջազգային ասպարեզում՝ վտանգելով տարիների ընթացքում ձեռք բերված դիվանագիտական հաջողություններն ու ազգային արժանապատվությունը: Սա վկայում է այն մասին, թե որքան կարևոր է պետական մտածողության և քաղաքական պատասխանատվության առկայությունը, որը ցավալիորեն բացակայում է մերօրյա իշխանությունների մոտ:
Սերժ Սարգսյանի օրինակն ի ցույց է դնում, որ արհեստավարժ, պատասխանատու կառավարումն ու դիվանագիտությունն են այն ուղին, որը կարող է ապահովել մեր երկրի ազգային շահերի պաշտպանությունը և միջազգային դիրքերի ամրապնդումը»:
